Últimos días para solicitar o Bono Cultura Xove

Na mañá deste martes 26 de setembro a subdelegada do Goberno en Lugo, Isabel Rodríguez, lembraba á mocidade lucense nada no 2005, que o sábado día 30 de setembro é o último día para solicitar o Bono Cultura Xove, unha axuda de 400 euros que volve ofrecer o Ministerio de Cultura e Deporte para os mozos e mozas de 18 anos, cun investimento total de 9.259.600 euros para financiar este plan.
Asemade, tamén subliñou que esa mesma data (30 de setembro), será o último día no que os participantes do bono cultural teñan dispoñíbel a cantidade para gastar.
Isabel Rodríguez, acompañada do concelleiro de Mocidade e Deportes, Jorge Bustos, e as xerentes da libraría lucense Trama, Rosa Suárez e Begoña Cuba, reuníronse para analizar e valorar o acollemento desta iniciativa na súa última semana para os beneficiarios do 2022 e que agora comeza para os do 2023.
Así, desde o 2022, preto do 50% da mocidade da provincia solicitou a axuda, realizando máis de 4.100 operacións por valor de 163.507 euros. Este mes, os primeiros 5.000 mozos e mozas de toda España xa comezaron a recibir as tarxetas, tanto virtuais como físicas, que lles permitirán facer uso da axuda deste 2023.
Engadir que en Lugo, hai máis de 20 establecementos adheridos e as entidades que queiran adherirse aínda están a tempo, o 30 de setembro finaliza tamén para eles o prazo para inscribirse e pódeno facer na ligazón específica habilitada.
As persoas interesadas precisan identificarse dixitalmente a través de Cl@ve ou co Certificado dixital. Poden realizar o trámite persoalmente ou a través da representación dun adulto, para o que é preciso achegar o formulario de representación descargábel na páxina web, correctamente asinado polo beneficiario e representante. Unha vez concedida a axuda, o importe total abónase nun único pago, en formato de tarxeta prepago virtual nominal que está vixente durante os doce meses vindeiros á concesión. A tarxeta é persoal e intransferíbel.
O bono divídese en tres apartados:
- 200 euros para artes en vivo, patrimonio cultural e artes audiovisuais.
- 100 euros para produtos culturais en soporte físico (libros, revistas, prensa, ou outras publicacións periódicas; videoxogos, partituras, discos, CD, DVD ou Blu-ray).
- 100 euros para consumo dixital ou en liña no que entran subscricións e alugueiros a plataformas virtuais.