Un 23% das distraccións ao volante dos galegos débense ao móbil
luns, 5 de agosto do 2019
Gonvarri
e Movistar presentaron os días pasados un estudo sobre o
comportamento ao volante dos cidadáns españois que guinda unha
serie de datos sobre os hábitos das galegas e galegos na estrada,
uns hábitos nos que irrompe o elemento tecnolóxico como elemento de
dúas vertentes contrapostas: de distracción se se empregan as TIC
de maneira incorrecta, de seguridade, sustentabilidade e comodidade
no caso contrario. Así,
no informe reflíctese que os galegos estabamos por enriba da media
nalgunhas boas prácticas, pero tamén noutras máis perigosas.
En
canto ás primeira, o 94% das e dos condutores da nosa terra respecta
a distancia de seguridade cando adianta a un ciclista (mentres que de
media en España faio un 86%), o 93% ten o seu vehículo en perfecto
estado de revisión e o 90% declara que non conduce baixo os efectos
do alcol.
Pola
contra, o 67% dos condutores galegos admite ter algunha distracción
ao volante que os puxo en perigo, das que un 23% debéronse a
distraerse co teléfono móbil. De feito, os enquisados consideran
que escribir mensaxes de Whatsapp, ler novas ou buscar información a
través deste dispositivo son “algunhas das distraccións máis
perigosas”. Outras malas prácticas que levamos a cabo durante a
condución son falar por teléfono sen mans libres (15%), fumar
(17,7%) ou escribir mensaxes (15%).
Xunto
ao estudo publicado por Gonvarri e Movistar, a operadora encabeza
tamén a campaña Rodamos Xuntos, que avoga polo respecto e a
convivencia na estrada entre os condutores e os ciclistas, “co
obxectivo de evitar este tipo de accidentes que se producen
especialmente nos meses de verán”. A web www.rodamosjuntos.org
ofrece consellos prácticos elaborados pola DXT e a RFEC mostrando
algunhas das situacións máis frecuentes que viven ciclistas e
condutores cada día.
Respecto
da investigación da que se extraen os datos cos que abrimos este
artigo, o estudo Emotional
Driving: españois ao volante, distraccións e uso do móbil,
forma parte do “compromiso de Movistar co benestar dixital”, unha
campaña xeral para fomentar o uso en positivo das novas ferramentas,
impulsando hábitos e metodoloxías que tiren proveito das TIC para
mellorar a vida das persoas, non para o contrario. Seguindo este fío,
Movistar puxo en marcha o portal www.dialogando.com.es,
destinado a fomentar o uso responsábel e seguro de Internet e os
dispositivos conectados, dende o que se desenvolven unha manchea de
campañas de sensibilización como Love Story, sobre a
suplantación de identidade na Rede; Dominó, sobre a
importancia de frear o ciberacoso; #MyGameMyName, sobre o
respecto e a tolerancia na contorna gaming e #TenemosLike,
para axudar ás familias a conectar cos seus fillos tamén a través
da tecnoloxía.