Un alumno do Carlos Casares de Xinzo gaña o concurso de deseño da camiseta de Galiciencia 2025

Galiciencia, a maior feira científica da nosa comunidade impulsada polo Parque Tecnolóxico de Galicia (Tecnópole), xa ten deseño para a súa camiseta oficial, con vistas a visualizar a nova edición do evento que se celebra en maio baixo o lema Neurociencia e saúde mental.
Par a creatividade da prenda convocouse un concurso entre o alumnado de Primaria de toda Galicia. As propostas debían ter como punto de referencia calquera obxecto ou contorna relacionada coa temática desta edición.
O gañador do concurso foi David Devesa González, alumno de sexto curso do CEIP Carlos Casares de Xinzo de Limia (Ourense).
Baixo o título A neurociencia, o seu debuxo amosa, segundo salientou o xurado, “un cerebro moi risoño, colorido e enérxico, do que saen elementos que irradian moita positividade, como varios corazóns, estrelas, ideas… e tamén sorpresas e incógnitas”.
Un xurado de expertos decidiu a proposta gañadora, da que se valorou “a súa creatividade e a conexión coa temática desta edición da feira”.
Ao certame presentáronse un total de 382 debuxos procedentes de 17 centros educativos de Primaria de toda a comunidade, cifras que se van incrementando ano tras ano. O rapaz premiado recibirá camisetas para toda a súa clase, con exemplares tamén para os seus profesores e familiares. Así mesmo, distribuiranse camisetas entre o persoal da organización de Galiciencia e entre o alumnado que presente os seus proxectos na feira.