Un brazalete de papel electrónico trunfa en Indiegogo

xoves, 12 de febreiro do 2015 Marcus Fernández

Durante o primeiro día de campaña de micromecenado en Indiegogo o proxecto de brazalete de papel electrónico Tago Arc consegue superar os 40.000 dólares que completarían o seu financiamento, polo que os seus mecenas poderán recibir este produto o vindeiro mes de decembro.
O uso da tecnoloxía de tinta electrónica para a moda non é algo novo, pero parece que a proposta dun brazalete que conta cun panel que presenta un deseño que pode personalizarse en calquera momento dende un smartphone conseguiu verse como un produto moi atractivo (posiblemente polo acerto de lanzar a campaña de captación de fondos poucos días antes de San Valentín).
Para funcionar, este curioso accesorio conta cunha pequena batería interna suficiente para operar durante anos cunha única carga, e para comunicarse co móbil, en vez de apostar pola tecnoloxía Bluetooth, emprega NFC, o que garante unha maior autonomía e un uso máis sinxelo. O panel de papel electrónico do brazalete ten unha densidade de 150 puntos por polgada e pode presentar 16 niveis de gris, o que permítelle amosar unha grande riqueza de deseños que poden transferirse nun tempo de entre 5 e 15 segundos. O corpo metálico no que está integrado o panel estará dispoñible en tres tamaños e en tres cores distintas (negro, dourado e prateado).
No momento de escribir estas liñas é posible facerse cun destes brazaletes por 199 dólares (187,74 euros con portes incluídos), aínda que o número de unidades para este prezo é limitado, pasando logo a venderse cada Tago Arc por 259 dólares (240,37 euros).

O Tago Arc parece ter acertado no xeito de aplicar tecnoloxía á moda

PUBLICIDADE