Un centenar de técnicos de concellos participaron na xornada do CPEIG sobre protección de datos
venres, 23 de marzo do 2018
- Fernando Suárez na apertura da xornada celebrada en Santiago
Achegar
información de utilidade sobre os cambios inminentes en materia de
regulamento sobre salvagarda de información persoal e privacidade,
facendo fincapé en como atinxen estes cambios ás administracións. Este
foi un dos grandes obxectivos do evento celebrado hoxe polo Colexio
de Enxeñaría en Informática de Galicia (CPEIG),
unha
xornada
técnica e divulgativa que
foi inaugurada pola directora da Axencia para a Modernización
Tecnolóxica de Galicia, Mar Pereira, o vicepresidente executivo da
Federación Galega de Municipios e Provincias (FEGAMP), Manuel Mirás,
e o presidente do CPEIG, Fernando Suárez. O obxectivo da xornada,
máis en detalle, foi botar luz sobre
o impacto do regulamento xeral de protección de datos sobre a
actividade dos concellos e outras administracións
públicas.
A
actividade, que se celebrou esta mañá no edificio CERSIA de
Santiago, contou coa colaboración da FEGAMP e AMTEGA e
a presenza dun centenar de técnicos.
Na
xornada abordouse a cuestión da importante responsabilidade das
administracións públicas, incluídas por suposto as locais, no que
se refire á información dos cidadáns. Así, lembrouse aos
presentes que os concellos e as restantes entidades públicas son
“responsábeis
e encargadas de tratamentos de datos persoais no desenvolvemento
de moitas das súas actividades”, polo
que o
Regulamento Xeral de Protección de Datos (RXPD), que
será de aplicación a partir do 25 de maio, implicará un gran
esforzo de adaptación de todas as partes implicadas (cidadáns,
empresas, entidades públicas), atinxindo de cheo ás administracións
locais.
En
palabras de Fernando Suárez, “o
novo regulamento de protección de datos suporá unha garantía
adicional e seguridade para os cidadáns, especialmente nas súas
relacións electrónicas. Isto supón un reto para concellos e resto
de administracións
públicas
que terán que facer un gran esforzo para adaptarse a esta normativa
de alcance europeo. Entre as principais novidades destacan a
realización dunha análise de riscos, o consentimento verificábel
para a obtención de datos de carácter persoal e a creación da
figura do delegado de protección de datos”, indicou
o presidente do CPEIG, que engadiu que o colexio confía
que este regulamento “supoña tamén un punto de inflexión de cara
á concienciación da necesidade dunha regulación profesional, xa
que é obvio que asuntos críticos como a seguridade xurídica e
física das persoas deben ser garantidos por profesionais coas
competencias e coñecementos acordes á súa responsabilidade”.
Na
súa intervención, Manuel Mirás destacou que os concellos “somos
os primeiros que temos que aplicarnos o conto e ser máis esixentes
con nós mesmos e cos nosos veciños” á hora de cumprir a lei en
calquera materia. “Non só temos que mellorar nós, as demais
administracións tamén teñen que esforzarse e apoiarnos
economicamente, informarnos, axudarnos coas estratexias de cambio de
mentalidade, ofrecernos campañas informativas, pero sobre todo non
darnos máis competencias sen acompañalas dunha memoria económica
que clarifique os gastos e quen se fará cargo deles”.
O
tamén alcalde de Oroso indicou que desde a FEGAMP,
amais
de “pedir vehementemente a necesidade de aclarar os ámbitos
competenciais e de facer orzamentos de custo dos servizos”,
decidiuse “apoiar aos concellos nesta época de cambios con
formacións en diferentes materias”, e por iso tan só no mes de
marzo a
entidade
organizou varias xornadas formativas dirixidas aos concellos e aos
seus representantes e técnicos/as.
Polo que se refire a Mar Pereira, salientou na inaguración que a nova normativa obriga ás administracións a xerar un clima de confianza cos cidadáns no actual contexto dixital e que tamén contribuirá a concienciar á sociedade sobre a importancia de xestionar de maneira axeitada a súa privacidade na Rede e nas súas relacións online con empresas e entidades públicas. Mar Pereira fixo fincapé na complexidade que supón a adaptación ao novo regulamento, especialmente para as entidades de menor tamaño como os concellos e avanzou as liñas que está a seguir a Xunta para cumprir co RXPD.
Na
cita tamén participaron o profesor de Dereito Constitucional e
director do Centro de Estudos de Seguridade (CESEG-USC), José Julio
Fernández; a directora Xeral de UNIVE Avogados, Carmen Cas; o xefe
do departamento de Seguridade en Amtega, Gustavo Herva; e o doutor en
Dereito e director do Master Protección e Tratamento de datos da
Universidade de Santiago de Compostela (USC), Daniel Neira.