Un equipo de Ribeira imponse na cuarta edición do certame D3Mobile
venres, 17 de xuño do 2016
Xa temos os gañadores da cuarta edición do
D3Mobile Metrology World League, o certame de modelado 3D de
precisión con teléfono móbil convocado polo grupo USCAN3D da
Universidade de Santiago. Trátase,
para comezar, do equipo Aspaveres, do concello coruñés de Ribeira,
que vén de obter o primeiro posto do campionato. O equipo
salvadoreño Black Rangers, do Colexio Español Pai Arrupe de San
Salvador e o equipo Awawa69 do IES Aguilar e Cano de Estepa (Sevilla)
proclamáronse subcampión e terceiro clasificado, respectivamente,
deste torneo. Nesta edición 2016 do torneo internacional
participaron 1.348 alumnos e 249 profesores de 223 centros educativos
de 37 países de todo o mundo. Ademais, case
60 equipos chegaron á final.
O equipo galego Aspaveres está integrado por Abel
Muñiz Cameán, Marta Franco González, Almudena Pérez Parada e José
Manuel Pena Fernández, coordinados pola profesora Margarita Saborido
Ojea. Os gañadores elaboraron o modelo 3D dun calzado deportivo moi
popular entre as novas xeracións, en palabras da organización do
certame “un obxecto que xa foi modelado en 3D por outros
participantes varias edicións anteriores e que se está convertendo
xa nun clásico do campionato”. Cada alumno deste equipo recibirá
un premio tecnolóxico e o centro ao que pertencen, que conseguiu
tamén o primeiro premio por equipos, equipamento de laboratorio,
unha subscrición á revista Educación 3.0 e unha
zapatilla asinada por Pau Gasol.
Pola súa banda, o equipo Black Rangers do Salvador,
formado polos alumnos Salvador Mejía Rosales, Ariel Alexander Cruz
Martínez, José Alejandro Ramírez Trujillo e Carlos Rafael Gil
Alvarado, e coordinados polo profesor Salvador Ernesto Rivas Leiva,
rematou na segunda praza da clasificación final, tras elaborar o
modelo 3D dunha
estatua da Virxe María. O terceiro posto foi para os alumnos
Eduardo Muñoz Tejada, Rafael Muñoz Sánchez e Sergio Gálvez
Martín, do equipo estepeño Awawa69 que, coordinado polo profesor
Salvador Páez Díaz, realizaron o modelo
3D dun galo.