Un informe alerta de que o galego está ameazado no dixital

mércores, 26 de setembro do 2012 Marcus Fernández

A rede pan-europea de excelencia Meta-Net presenta hoxe unha serie de 31 libros brancos co gallo do Día Europeo das Linguas, e que alerta de que 21 do 30 idiomas europeos analizados están en perigo de extinción no ámbito dixital por carecer de ferramentas automáticas de tradución, procesado de textos ou recoñecemento de voz o suficientemente desenvolvidos como para manter unha presenza significativa no contorno tecnolóxico.
Entre as linguas ameazadas estarían o catalán, o éuscaro e o galego, que padecen un situación moi diferente ao español, que aproveita a súa presenza internacional para gozar do apoio das grandes multinacionais á hora de incorporar linguas aos seus produtos e servizos, converténdose nun idioma con máis apoio que outras linguas europeas como o alemán ou o francés.
O libro branco sobre O Idioma Galego na Era Dixital, foi un traballo coordinado por Carmen García Mateo e Montserrat Arza Rodríguez (ambas da Universidade de Vigo) coas contribucións de Xaier G. Guinovart (Universidade de Vigo), Eduardo R. Banga (Universidade de Vigo), Xosé Luís Regueira (Universidade de Santiago de Compostela) e José Ramom Pichel (Imaxin Software), traballo do que adiantaron algúns detalles o ano pasado, e que sostén que a revolución dixital (comparable á invención da imprenta por Gutenberg) é un risco para a nosa lingua e un reto para a tecnoloxía lingüística.
O informe tamén dá conta da limitada presenza do galego na Internet, aínda que existan iniciativas a ter en conta como a Galipedia, a iniciativa para conseguir un dominio de Internet para a lingua e a cultura galegas, a posibilidade de que servizos como Google e Facebook estean dispoñibles en galego, que existan numerosas iniciativas defendendo a nosa lingua a través do software libre ou que proliferen os xornais en liña en galego (aínda que nalgúns casos correspondan a xornais en español traducidos de xeito automático).
As conclusións do texto relativo ao galego é moderadamente optimista, pois en Galicia hai unha comunidade investigadora en tecnoloxías da lingua con apoio institucional e producíronse numerosos recursos e tecnoloxías de última xeración para o galego, aínda que por outra banda dáse conta do reducido tamaño do sector TIC galego e do pouco apoio por parte das grandes multinacionais á hora de apoiar a linguas cun número reducido de falantes.

PUBLICIDADE