Un investigador da UDC publica en Nature os resultados da súa tese sobre integración de datos
mércores, 20 de xaneiro do 2016
- Lozano, Gestal e Dorado nunha imaxe da Universidade da Coruña
Un investigador da Universidade da
Coruña, Carlos Fernández Lozano, vén de publicar os resultados da
súa tese sobre integración de datos (e metodoloxías para
integralos dende diferentes canles e fontes de coñecemento) na
prestixiosa revista internacional Scientific Reports, que
é a versión en aberto da revista Nature. Fernández Lozano é
membro do Laboratorio de Redes de Neuronas Artificiais e Sistemas
Adaptativos (RNASA) do Departamento de Tecnoloxías da Información e
as Comunicacións da Facultade de Informática (UDC). O seu traballo
foi dirixido polos doutores Marcos Gestal e Julián Dorado. Como
dixemos, a tese fornece unha metodoloxía de xestión de información
multifonte: unha integración que amplía, e moito, as
posibilidades de interpretación dos resultados finais de calquera
tarefa que implique a entrada en xogo do Big Data (información
masiva).
A través da metodoloxía proposta,
sinala o autor da tese, “lógrase enfrontar un mesmo problema desde
múltiples puntos de vista á vez, ficando só aquelas partes que
conteñen a mellor información e facendo que ademais se agrupen,
incrementando o coñecemento do modelo, para formar unha solución
final seguindo o que se coñece como Fusión de Información”.
Segundo engade, son precisamente ámbitos hoxe tan espallados como o
Big Data os que teñen a capacidade de impulsar técnicas como a
desenvolvida a través da súa tese. A maiores, este traballo pode
ser aplicado a múltiples problemas e segue as directrices da
estratexia Open Science do programa Horizonte2020 da Unión Europea.
O estudo, iniciado polo grupo de
investigación RNASA-IMEDIR, dirixido polo profesor Alejandro Pazos,
e o Instituto de Investigación Biomédica da Coruña, contou coa
estreita colaboración de investigadores pertencentes á Universidade
de Bristol e á Universidade de Stanford.
Esta publicación de Nature forma
parte da Tese de Doutoramento pola que Carlos Fernández Lozano
obtivo a nota de Sobresaínte cum laude. A investigación
segue a estratexia de Open Science do programa H2020 da UE,
polo que se pode descargar libremente. Segundo explican dende a
Universidade da Coruña, a publicación nesta revista científica
“ten uns criterios de escolla moi esixentes, posto que a unha
primeira preselección en que dous editores analizan a calidade
científica, segue unha segunda revisión por tres expertos que
someteron ao artigo a tres roldas de revisión ata a súa
publicación”.