Un novo xogo de Pokémon axuda a aprender mecanografía

Nun momento no que a Operación Pokémon está de máxima actualidade Nintendo sorpréndenos ao anunciar que o novo xogo Aprende con Pokémon: aventura entre las teclas chega hoxe ás tendas españolas a prezos que oscilan entre os 51,90 e os 61,50 euros en establecementos físicos, o que pode resultar algo caro para un xogo de Nintendo DS, pero está xustificado porque inclúe unha base (para colocar na posición correcta a DS ou a 3DS) e un teclado Bluetooth capaz de funcionar ata 1.500 horas con 2 baterías AA e que poderá empregarse tamén como teclado externo para móbiles, tablets ou ordenadores persoais con Bluetooth.
¿Para que precisa este xogo de Pokémon un teclado sen fíos? Pois resulta que este título para Nintendo DS (compatible con 3DS) pretende axudar aos cativos a introducirse na mecanografía dun xeito divertido, animándoos a incorporarse ao Club de Mecanografía e investigar a máis de 400 Pokémon á vez que se poñen a proba de xeito gradual as súas habilidades coas teclas (haberá que teclear os nomes das criaturas que atopemos para capturalas na Typing Ball).
Este novo xogo permitirá desbloquear ata 60 niveis diferentes, conseguir 180 medallas e estudar aos Pokémon menos comúns (incluíndo os Pokémon Lendarios como Reshiram e Zekrom).