Un proxecto do Campus de Pontevedra integra software e hardware libre na preparación deportiva
venres, 27 de novembro do 2020
O
Campus de Pontevedra está a dar a forma a un programa de
adestramento que busca mellorar o rendemento das e dos deportistas a
través das ferramentas tecnolóxicas, concretamente mediante o uso
dunha plataforma de forzas de baixo custo feita con software e
hardware libre. O
programa abéirase á materia Metodoloxía e planificación do
adestramento deportivo I, do grao en Ciencias da Actividade
Física e do Deporte. O profesor responsábel da materia, Óscar
García, explica que a orixe do mesmo está en que para avanzar en
capacitación e coñecemento deportivo resulta clave “dispor de
datos como os da forza ou presión que o deportista é capaz de
exercer”.
Estas
medicións, engade, poden levarse a cabo cunha plataforma de forzas,
mais, dado o custo destes equipamentos, os futuros e futuras
profesionais poden atopar tamén alternativas de baixo custo como os
dispositivos de medición de presión elaborados con software e
hardware libre que as e os estudantes da materia poñen a proba
nestas semanas no marco dun proxecto de innovación educativa.
Achegar
ao alumnado as novas tecnoloxías de control da carga de adestramento
é de feito un dos obxectivos deste proxecto, seleccionado na
convocatoria da Facultade de Ciencias da Educación e do Deporte para
o presente ano e dirixido tamén á elaboración de diferentes
ferramentas que faciliten a asimilación dos contidos da materia e a
súa transferencia ao futuro desenvolvemento profesional. Coordinado
por García, o proxecto no que participan tamén os investigadores
Javier Carballo, Tania Álvarez, José María Cancela, Helena Vila,
Emerson Ramírez, Alba Cuba e Mario Iglesias inclúe a elaboración
de pílulas educativas en vídeo, dun mapa conceptual da materia ou
dun caderno de prácticas.
Unha
das accións inseridas no proxecto é promover que o alumno poña a
proba a “plataforma de forzas de baixo custo” desenvolvida por
Carballo con software e hardware Arduino. Trátase, como explica este
investigador, dunha peza construída con dúas placas condutivas e
unha resistencia central, que impide que a corrente pase dun lado a
outro salvo que a lámina se deforme pola presión ou por un impacto.
En palabras de Carballo, “canta máis presión se faga, máis
voltios pasarán”, e estas variacións rexístranse á súa vez,
grazas a un microcontrolador e un programa de software libre, nunha
serie de valores, dos que se pode calcular, situando sobre as láminas
un determinado peso, a súa equivalencia en quilos. Trátase pois
“dun modelo moi sinxelo” co que o alumnado “pode explorar a
forza xerada nun salto ou nun determinado xesto deportivo” e que,
como apunta García, “evidentemente, non ten a fiabilidade dunha
plataforma, pero si que cuantifica moi ben calquera presión, o que
permite calcular algo que non podes medir habitualmente”.
Co
obxectivo de que poidan probar o seu funcionamento, repartíronse
entre as e os estudantes da materia unha vintena destes dispositivos,
á vez que se lles achegou “unha guía moi básica”, que lles
permita o seu uso.