Un xogo en Flash permite enfrontar en combate a distintos personaxes bíblicos

mércores, 9 de maio do 2007 Marcus Fernández

O programa de animación adulta da canle de televisión TNT (chegada a España este mesmo mes), Adult Swim, publica na Internet múltiples xogos en Flash que resultan sumamente entretidos e divertidos, pero coa súa última entrega están a acaparar moita atención, xa que o Bible Fight é un xogo de loita no que se enfrontan 6 personaxes bíblicos: Xesucristo, Eva, a virxe María, Moisés, Noé e Satanás.
O Bible Fight conta con dúas modalidades de xogo: torneo e arcade. Ademais, cada personaxe ten varios golpes especiais que resultan tanto orixinais coma simpáticos, podendo ver a Cristo golpear cunha cruz, a Moisés utilizando contundentemente as táboas da Lei ou a Noé atacando cunha manada de animais.
Concluímos dicindo que o xogo parece acadar os seus obxectivos sobradamente, pois resulta rechamante o seu descaro á vez que entretén ós internautas que se achegan a el para botar unha partida e tentar descubrir cal é o personaxe oculto ó que só se pode acceder tras avanzar debidamente no xogo (aínda que advertimos que é doado adiviñar de quen se trata).

PUBLICIDADE