Unha aplicación de Samsung podería axudar a reducir o mareo en viaxes

Case un terzo da poboación sofre mareo por movemento durante as viaxes, con síntomas como vertixe, náuseas ou sudación. Co obxectivo de ofrecer unha alternativa sen fármacos, Samsung presentou unha nova proposta baseada na reprodución dun ton específico a través de auriculares sen fíos en combinación cunha aplicación móbil.
A solución articúlase arredor da aplicación Hearapy, de balde, que funciona xunto cos Galaxy Buds4 Pro. O sistema emprega un ton sinusoidal de 100 Hz que estimula o sistema de equilibrio do oído interno e contribúe a reducir as molestias asociadas ao mareo.
O fenómeno do mareo prodúcese por un conflito sensorial: mentres o oído interno detecta movemento, a vista pode estar fixa nun elemento estático, como a pantalla dun smartphone ou un libro. Esa discrepancia xera unha resposta de estrés no organismo. Ata o momento, as opcións máis habituais para mitigalo incluían medicamentos (con posibles efectos secundarios) ou técnicas como a acupresión.
A proposta de Samsung baséase en investigacións realizadas pola Universidade de Nagoya (Xapón), que analizaron que tipo de estímulo sonoro resulta máis efectivo para activar o órgano do equilibrio. Os estudos conclúen que a exposición durante 60 segundos a un ton de 100 Hz cun volume de entre 80 e 85 decibeles pode mellorar a capacidade de manter o equilibrio.
As probas realizadas con persoas con mareo por movemento indican unha redución do estrés e dos síntomas durante desprazamentos en coche, cun efecto que pode prolongarse ata dúas horas. Iso si, os investigadores subliñan que o ton debe escoitarse sen interferencias doutras fontes sonoras e cunha frecuencia exacta, en ambos oídos e durante polo menos un minuto antes da viaxe.
A aplicación Hearapy integra un temporizador que fixa automaticamente a duración en 60 segundos e axusta o volume a arredor de 85 decibeles, un nivel comparable ao ruído dun cortacéspede. Pola súa parte, os Galaxy Buds4 Pro están deseñados para reproducir con precisión ese ton, grazas a melloras no deseño do altofalante, cunha superficie de vibración maior que na xeración anterior, e a un sistema de audio de dúas vías.
Os auriculares tamén incorporan cancelación activa de ruído adaptativa (ANC), que emprega seis micrófonos para detectar o son ambiente e xerar sinais en fase inversa que o neutralicen. A isto súmase un ecualizador adaptativo que analiza en tempo real factores como a posición no oído ou o contorno acústico, co fin de optimizar a reprodución.
Esta combinación de hardware e software permite que o ton de 100 Hz se reproduza de maneira limpa e estable, condición necesaria para que o estímulo sobre o sistema vestibular resulte efectivo, aínda que cómpre salientar que a aplicación de Hearapy non fai unha comprobación do modelo de auriculares que se empreguen para realizar a escoita do ton de 100 Hz, polo que os usuarios son libres de probar esta solución cos seus auriculares habituais (aínda que a calidade dos mesmos influirá nos resultados).