Unha app achegaranos á riqueza histórica e vitivinícola de Oímbra a través de realidade aumentada e 3D

O Concello de Oímbra, a empresa Xoia e a Deputación de Ourense están a impulsar unha iniciativa innovadora para reivindicar e visualizar o rico patrimonio do devandito municipio a través de tecnoloxías de realidade aumentada e 3D. O proxecto, unha proposta que cingue riqueza histórica local, turismo e viticultura, foi dado a coñecer onte no consistorio pola alcaldesa Ana Villariño, o presidente da entidade provincial, Manuel Baltar e os responsábeis da dita compañía, Xoel Vázquez e Iván Olmos. Segundo fixeron saber, “trátase dunha iniciativa de vangarda tecnolóxica que amosa unha nova maneira de achegar aos visitantes os valores de Oímbra, que conta con importantes elementos arqueolóxicos e cun sector do viño que ten oito adegas acollidas á Denominación de Orixe Monterrei", explicou Manuel Baltar na presentación.
En termos máis concretos, o proxecto permitirá a visitantes e residentes percorrer e revivir “visual e informativamente” o devandito concello ourensán, que é, para quen non o saiba, o que xunta maior concentración de lagares rupestres, amais de acubillar unha adega do século XVIII cun alto valor arquitectónico.
Segundo indicou o presidente da Deputación, a iniciativa é un claro exemplo de como a tecnoloxía pode poñerse ao servizo da historia, fornecéndoa, e fornecéndonos, dunha “viaxe no tempo inclusiva e interactiva sen movernos do século XXI, valorizando a riqueza do noso rural".
A proposta pon en xogo unha aplicación móbil que é, en boa medida, o eixe tecnolóxico do proxecto. A través dela, o usuario poderá facer cousas como reconstruír o pasado local e ver en tempo real a época de meirande actividade e importancia dos Lagares de Oímbra, coas súas edificacións, as súas tarefas e as súas escenas “revividas”. Ao mesmo tempo, achégase aos usuarios completa información sobre a historia das adegas e as características do seu viño. En definitiva, a aplicación, amais dunha máquina de tempo, representa unha fonte de experiencias visuais innovadoras, lúdicas, didácticas e turísticas, sinalaron os responsábeis da mesma na presentación.
Ana Villarino salientou precisamente este factor turístico do proxecto: “Con esta aplicación pretendemos promover o turismo cara aos lagares de Oímbra e levar a cabo un labor de promoción económica das adegas". A alcaldesa de Oímbra agradeceu o apoio da Deputación de Ourense e subliñou "a importancia de pór en valor por medio da innovación tecnolóxica a riqueza histórica do municipio, que conta coa maior concentración de lagares rupestres".
Ademais da visualización en 3D dos lagares e da adega centenaria, o visitante poderá ver unha ficha con cada unha das adegas de Oímbra, na que se explica a súa historia e as características do seu viño, segundo explicaron os responsábeis de Xoia, que salientaron tamén a veracidade histórica que acompañada cada escena, a través do modelado 3D das estancias, xunto a personaxes, mobiliario e accesorios, ademais de animacións que permiten coñecer como se desenvolvía unha determinada actividade.
A ferramenta móbil, que non requirirá de conexión a Internet, só a súa descarga, estará dispoñíbel en galego e castelán para os sistemas iOS e Android.