Unha célebre streamer recoñece ser explotada sexualmente polo seu marido

luns, 17 de outubro do 2022 Marcus Fernández

Amouranth denunciando en directo os abusos do seu marido

O pasado verán a streamer Kaitlyn Michelle Siragusa, máis coñecida polo alcume Amouranth, sorprendeu ao mundo ao asegurar ter ingresado máis de 27 millóns de dólares a través de OnlyFans, de xeito que esta plataforma achegaríalle un rendemento moi superior ao que consegue a través de YouTube, Twitch e Patreon, de onde tamén consegue ingresos importantes.
Falamos cunha celebridade da Internet que conseguiu popularidade grazas ás comunidades de cosplay, e que agora facturaría máis de millón e medio de dólares ao mes, pero a súa historia vén de dar un xiro radical ao desvelar durante directo de Twitch que estaba casada, mantendo tal segredo por motivos comerciais (para resultar máis atractiva para os seus mecenas), e levando o tema moito máis aló ao denunciar os abusos que padecía por parte do seu marido, até poder considerase que está a explotala sexualmente para facer cartos.
Ao parecer, o marido desta rapaza de 28 anos tería o control das súas contas bancarias e redes sociais, o que serviríalle para ameazala en numerosas ocasións, non só asegurando que realizará doazóns de grandes cantidades económicas ou pecharía as contas en redes sociais, senón tamén chegando a ameazar con matar os seus cans se a streamer non accedía a facer directos conta a súa vontade (entre os que estarían os seus populares vídeos coñecidos como hot tubs, nos que podía vérselle en bikini nunha bañeira inchable mentres conversaba cos seus seareiros).
Aínda que o vídeo da retransmisión orixinal xa non está dispoñible en Twitch, existen numerosas copias circulando pola Rede, nas que poden verse as acusacións da streamer cara a súa parella, no que describe como un claro caso de abuso que está a dar visibilidade á fráxil situación das mulleres nas plataformas como OnlyFans, dando lugar a un novo tipo de proxenetas, aínda que neste caso o exercicio da prostitución sería virtual, de xeito que dificilmente pode ser perseguido.

PUBLICIDADE