Unha chea de xogos de balde para PS4 queren animarnos a quedar na casa

A iniciativa de PlayStation para animar aos xogadores a quedar na casa ante a situación sanitaria global, Play At Home, está de volta cunha chea de videoxogos que poden incorporar á súa colección dixital os posuidores dunha consola PlayStation, o que é unha grande oportunidade para descubrir grandes títulos independentes que ben poderían ter chegado a través de PlayStatition Plus, pero que sorprendentemente chegan totalmente de balde para calquera xogador.
Nesta ocasión os xogos que están dispoñibles de balde por tempo limitado son o emblemático Astro Bot Rescue Mission, considerado como o mellor xeito de introducirse na PlayStation VR, solución de realidade virtual para a que tamén ofrece a coidada aventura de Moss e o orixinal Paper Beast, títulos exclusivos para VR, mentres que os xogos Rez Infinite e Thumper son compatibles coa VR pero é unha posibilidade totalmente opcional.
Para os que non conten con casco de realidade virtual na súa PS4 outros xogos que temos de balde son Enter the Gungeon, ABZÛ, Subnautica e The Witness, xogos con boa sona no ámbito dos estudos independentes, que resultan bastante diferentes ao que estamos afeitos, polo que é moi recomendable botarlles un ollo se non os coñecemos, xa que este tipo de xoias poden descubrirnos xéneros realmente cativadores que simplemente son demasiado arriscados para que os aborden os grandes estudios.
A todos estes xogos unirase o vindeiro 23 de abril un dos mellores xogos da actual xeración de consolas, Horizon Zero Dawn, na súa edición completa (ou sexa, coas súas expansións), o que é todo un agasallo por parte de Sony, que parece claramente orientado a atraer xogadores para a súa futura secuela, ao igual que a morea de títulos de VR agasallados estes días pode animar a algúns a achegarse á realidade virtual no futuro, sabendo que xa teñen varios xogos de partida.