Unha investigación da UVigo constata o potencial da mercadotecnia móbil para incentivar as compras

O potencial das estratexias de mercadotecnia baseadas na localización veñen de ser avaliadas ao detalle pola investigadora Sara Teixeira, quen, na súa tese de doutoramento, puxo de manifesto as importantes posibilidades destas metodoloxías de traballo para impulsar a intención de compra dos consumidores. Trátase da primeira investigación destas características que avalía os efectos destas técnicas no comportamento do consumidor ibérico (españois e portugueses).
As opinións reunidas no seu traballo, tanto de expertos como de clientes, permitiron á xa doutora en Comunicación pola Universidade de Vigo constatar as actitudes positivas cara a adquisición de produtos e servizos que xeran as diferentes ferramentas móbiles centradas na localización, como as alertas, mensaxes ou promocións baseadas na posición xeográfica dos potenciais clientes.
Dirixida polo profesor da Facultade de Ciencias Sociais e da Comunicación Benigno Fernández Salgado e polo docente da Universidade de Trás-os-Montes e Alto Douro Ramiro Gonçalves, a tese A influência do mobile marketing na intenção de compra do consumidor ibérico buscaba identificar aqueles factores e ferramentas que favorecen ou inhiben a compra, “con vistas a dar a coñecer ás organizacións os métodos máis eficaces de interactuar con estes”, como salienta Texeira. Con ese obxectivo, reuniu as opinións dun panel de especialistas ademais de realizar un inquérito de persoas de España e Portugal, constatando o seu comportamento proclive a consumir produtos e servizos a raíz de diversas estratexias centradas nos dispositivos.
A investigadora realizou en primeiro termo un estudo de carácter cualitativo, para o que reuniu un panel integrado por 21 profesionais da mercadotecnia. En termos xerais, este grupo de expertos concluíu que o marketing móbil “influencia positivamente a intención de compra do consumidor ibérico sobre un determinado produto ou servizo”, e destacou “a confianza e a facilidade de uso percibida” como os elementos máis determinantes de cara a xerar unha “actitude favorábel”.
Como continuidade este panel, Teixeira levou a cabo unha análise de carácter cuantitativo, baseada no envío dun cuestionario respondido por 73 persoas. Neste estudo, tamén os servizos baseados na situación xeográfica dos potenciais clientes foron salientados “como a ferramenta que en maior medida poden xerar unha actitude positiva no consumidor”. As e os participantes tamén destacaron a confianza e a facilidade de uso como os elementos que en maior grao poden xerar unha influencia positiva.