Unha nova consola permitirá gozar dos xogos para Nintendo 64

luns, 16 de outubro do 2023 Marcus Fernández

Nos últimos meses conseguiu un éxito relativo a consola portátil Analogue Pocket, que mediante FPGA permite simular o hardware de consolas clásicas (en vez de apostar pola emulación mediante software) permite gozar de cartuchos orixinais de Game Boy, Game Boy Color e Game Boy Advance de xeito directo (e de Game Gear, Neo Geo Pocket Color e Atari Linx empregando adaptadores).
Estamos ante unha tendencia emerxente dos videoxogos retro na que usuarios conscientes das dificultades de manter vivas as consolas orixinais optan por hardware novo que ofrece a experiencia clásica máis pura posible.
Mantendo este espírito presentan agora a Analogue 3D, que chegará o ano que vén, e que preséntase como unha reimaxinación da Nintendo 64, capaz de funcionar con xogos de todas as rexións e presentalos en pantallas 4K con distintas opcións de visualización.
A nova consola permitirá a conexión de mandos orixinais de Nintendo 64 nos seus 4 portos, aínda que tamén será compatible con mandos sen fíos. Aínda non amosaron como será a súa aparencia final, pero en vista do éxito do resto de produtos de Analogue e o interese que está a suscitar esta liña dos videoxogos retro é de esperar que sexa unha máquina que incluso teña problemas de abastecemento pola súa elevada demanda (pese a que probablemente teña un prezo bastante elevado).

PUBLICIDADE