Unha pantalla táctil con LED infravermello imponse na feira Galiciencia

O palmarés da edición 2014 da feira da mocidade científica Galiciencia tivo sabor TIC. De feito, segundo nos conta a organización do certame (Tecnópole-Parque Tecnolóxico de Galicia), a achega gañadora (gañadora absoluta) foi a pantalla táctil con LED infravermella concibida e desenvolvida polos escolares-investigadores Pablo González e Efrén Varon, do Colexio Santa Teresa de Xesús Carmelitas de Ourense, cuxo proxecto tecnolóxico foi salientado de xeito unánime polo xurado. Así, proclamouse vencedor na categoría de segundo ciclo da ESO e foi gañador absoluto tras impoñerse aos puntos aos enxeños dos outros dous equipos gañadores nas modalidades de primeiro ciclo da ESO e Bacharelato.
Por certo que Pablo e Efrén, en virtude do éxito acadado os días pasados en Ourense, levarán o seu invento a Exporcerca, en palabras da Tecnópole “a feira científica máis importante do Estado”, que se celebrará en Barcelona na primavera de 2015. O enxeño destes dous rapaces investigadores consistiu nun sistema que converte calquera pantalla de ordenador convencional nunha pantalla táctil. Segundo contaron eles mesmos na feira galega, o desenvolvemento “inclúe un punteiro con luz LED co que se pode escribir na pantalla, ao tempo que usamos o mando da Wii como dispositivo de conexión bluetooth entre o punteiro e a pantalla”, explican. O sistema pode usarse tanto na pantalla do ordenador como nunha proxección se se quere visualizar a meirande escala.
Lembrar que nesta edición de Galiciencia acadaron a case todos os niveis cifras maiores ca nas convocatorias previas. De feito, participaron finalmente 44 equipos de estudantes de ESO e Bacharelato de toda Galicia e tamén de Barcelona, aos que este ano se sumaron como novidade outros 20 de Primaria fóra de competición.
Os premios foron entregados polo director da Axencia Galega de Innovación, Manuel Varela, que agradeceu “o esforzo de alumnos e profesores” e destacou que a súa iniciativa “ten moito mérito”. Asemade, valorou moi positivamente o papel de Galiciencia e das actividades que abrangue (como as Aulas Galiciencia) no camiño de espertar e afianzar carreiras científicas entre os nosos nenos e adolescentes.
O gañador na categoría de 1º ciclo da ESO, Beltrán Sousa, do Colexio Guillelme Brown (Pereiro de Aguiar, Ourense), amosou a utilidade das labras de lapis e ceras de cores para fabricar calcetíns e soletas para zapatos cómodos, económicos e ecolóxicos.
Na categoría de Bacharelato as gañadoras foron Olalla Álvarez e Sara González, do IES David Buján de Cambre (A Coruña), que deseñaron un sistema de alerta de temperatura para instrumentos musicais. Así, mediante un pequeno circuíto implantado nas fundas dos instrumentos e dotado con sensor de temperatura e humidade, o usuario recibe alertas sonoras e luminosas mediante luces LED cando se acadan condicións ambientais que poden ser prexudiciais.
Cada un dos membros dos tres equipos gañadores levou unha cámara deportiva de fotos e vídeo. Este ano tamén se entregaron diplomas aos segundos e terceiros clasificados en cada categoría.
Saray Ramiro, do Colexio Guillelme Brown, quedou segunda na categoría de 1º ciclo da ESO co seu proxecto de elaboración de plástico biodegradable empregando como materia prima leite de orixe animal. O terceiro posto nesta categoría correspondeulle a Matías Caballero e Pablo Rodríguez, do Colexio Alborada de Vigo, polo seu estudo sobre o cultivo das ascidias (organismos mariños que teñen capacidade para filtrar) na Ría de Vigo para producir biomasa.
Na categoría de 2º ciclo da ESO, o freo de seguridade para cadeiras de bebé de Diego García e Ignacio González, estudantes do Colexio Los Sauces (Mos, Pontevedra), quedou clasificado en segundo lugar. O terceiro correspondeulle ao proxecto de síntese de biodiésel a partir de aceite de cociña usado deseñada por Carlos Martínez e David Santos, do CPI San Sadurniño (A Coruña).
O segundo clasificado na categoría de Bacharelato foi o proxecto de conservación de alimentos mediante ultrasóns desenvolvido pola ourensá Claudia Escapa nas Aulas Tecnópole, mentres que o terceiro foi para o robot submarino Tecnorov de Ángel Muiño e Daniel Pérez do IES Ortigueira (A Coruña).