Unha vintena de entidades participa no terceiro Foro Emprego da ESEI de Ourense
martes, 20 de marzo do 2018
Esta semana, entre hoxe e mañá, celébrase na
Escola
Superior de Enxeñaría en Informática do Campus de Ourense unha
nova edición (a terceira) do Foro Emprego. A cita, un espazo
común para empresas do sector TIC e alumnado (onde poder establecer
contacto e achandar o terreo para máis que posíbeis colaboracións
laborais) desenvólvese a partir das 10.00 horas no salón de graos
do Edificio Politécnico. No foro están a participar arredor dunha
vintena de compañías e entidades, todas elas co nexo común de
demandar profesionais do eido tecnolóxico. Segundo apuntou a Escola
na inauguración (hoxe pola mañá) do encontro, “o que diferenza
este foro de emprego doutros é que o alumnado participa nel
consciente das vantaxes que lle dan as elevadas taxas de
empregabilidade destes titulados e tituladas”.
O obxectivo da iniciativa, explica Francisco
Javier Rodríguez, director da Escola Superior de Enxeñaría
Informática, é duplo. Por unha banda,“ao alumnado permítelle
coñecer o mercado laboral, contactar con empresas do sector e ver
que proxectos están a desenvolver na actualidade”. Por outra
banda, sinalou, “ás empresas permítelles contactar co alumnado de
mestrado e de grao desde etapas temperás, antes da súa saída ao
mercado laboral”. O director da ESEI tamén lembrou as “altas
taxas de empregabilidade do sector, superiores ao 90% unha vez remata
a titulación”.
Repetindo moitas delas de anteriores edicións, o
foro conta coa participación de empresas e entidades como Bahía
Software, Tecnologías Plexus, Grupo Cuevas, Balidea Consulting,
Viewnext, Gradiant, Altia, Redegal, Arbentia Consulting, Optare
Solutions, Imatia Innovation, Sivsa Soluciones, Coremain, Everis e
Indra Sistemas.
A programación permite ao alumnado asistente
asistir a presentacións de cada unha destas entidades e por outra
realizar entrevistas individuais cos representes destas empresas,
entrevistas nas que os estudantes poden entregarlles os seus
currículos e establecer contacto.
A primeira das presentacións correu a cargo de
Bahía Software, empresa de consultaría tecnolóxica de software a
medida nada en 1999 e que na actualidade conta con arredor de 180
traballadores e traballadoras. Iria Vázquez, técnica de selección
da entidade, e Álvaro Suárez, responsábel da delegación en
Ourense, foron os encargados de explicar ao alumnado presente as
características da empresa, dalgúns dos perfís tecnolóxicos que
están a procurar e de proxectos que na actualidade están a
desenvolver en diferentes eidos, sobre todo no da saúde.