Unha xornada da ISSGA pon de manifesto como a Intelixencia Artificial pode mellorar a seguridade laboral
martes, 4 de outubro do 2022
Este
4 de outubro inaugurouse a xornada técnica Aplicacións da
intelixencia artificial na análise biomecánica, unha nova
iniciativa no marco da oferta formativa do ISSGA (Instituto de
Seguridade e Saúde Laboral de Galicia), en formato webinario
e dirixida a mostrar as oportunidades que levará consigo a
aplicación na mellora da seguridade e a saúde laboral das
tecnoloxías disruptivas e con capacidade para xestionar grandes
cantidades de datos, comprendelos e tomar as mellores decisións.
Abriu a xornada a xerente do instituto, Adela Quinzá-Torroja, quen
destacou algunhas das principais potencialidades da IA no dito
ámbito.
Na
iniciativa, desenvolvida coa colaboración de expertos do Instituto
de Biomecánica de Valencia (IBV), sinalou que os consellos en tempo
real derivados da aplicación da Intelixencia Artificial poden
influír na mellora da vixilancia da seguridade e saúde no traballo,
reducindo a exposición a diversos factores de risco, como o acoso e
a violencia, e proporcionando, entre outros, alertas temperás de
estrés e/ou problemas de saúde e fatiga. “A información obtida
podería ser utilizada polas organizacións para identificar os
problemas de seguridade e saúde no traballo, incluídos os riscos
psicosociais”, apuntou.
Quinzá-Torroja,
sinalou, ademais, que a aplicación das ferramentas disruptivas e
intelixentes na análise biomecánica pode ser de gran utilidade na
avaliación e deseño de postos de traballo, desde o punto de vista
da ergonomía, “permitindo avanzar no obxectivo de realizar
avaliacións ergonómicas simuladas para mellorar os procesos de
redeseño de liñas de fabricación”.