VIKO lanza unha aplicación especializada en comercio electrónico e mercadotecnia
mércores, 9 de setembro do 2015
O grupo VIKO, co galego
Rubén Ferreiro á fronte, vén de lanzar o que cualifica da primeira
aplicación especializada especificamente en comercio electrónico e
mercadotecnia dixital. A ferramenta, achegada a través do
proxecto editorial Marketing4eCommerce, inserido en VIKO, foi
desenvolvida pola axencia mCommerce Moddity e salienta por achegar
cronoloxicamente todas as novidades publicadas no devandito proxecto
sobre a actualidade da actividade comercial 2.0. Amais de fornecer
información, permítenos navegar polas seccións do proxecto
editorial, contactar coa redacción da revista e compartir cada
contido nas redes sociais, no WhatsApp ou a través de email.
Segundo explica o galego
Rubén Bastón, director de Marketing4eCommerce (que é o nome,
tamén, da aplicación lanzada estes días), con esta ferramenta
móbil búscase cubrir un baleiro detectado no mercado e que é o de
poder acceder de maneira directa, a través do noso dispositivo, ás
últimas novidades do sector do comercio electrónico e a
mercadotecnia en liña.
Bastón engade que a app
que se fornece agora carrexa integrada outra ferramenta
complementaria de gran interese para os profesionais do sector e para
as empresas, que é a ferramenta eMMa para o mantemento de clientes
no tempo (fidelización), “que permitirá facer avisos
puntuais aos usuarios que a descargaron para alertalos das novas que
consideremos de abondo relevantes”.
Sobre as razóns
complementarias que motivaron ao desenvolvemento de
Marketing4eCommerce, Rafael Sotelo, coordinador de redacción do
proxecto editorial, explica que a orixe da app estivo tamén
nas necesidades da iniciativa de dar resposta cumprida ao medre
continuo de tráfico de datos que se recibía vía móbil. Arestora,
di, “máis do 40% do tráfico chega xa a través de móbil e, en
menor medida, vía tableta”. Acerca de ter apostado por App Store,
Sotelo conta que malia haber moitos máis dispositivos Android na
rúa, a porcentaxe de tráfico entre Android e iOS está á par, o
que nos fixo pensar que o interese relativo era maior en iOS, por iso
empezamos coa App Store”. De
feito, a aplicación xa está dispoñíbel para descarga na tenda en
liña de Apple.
Respecto do proxecto
editorial Marketing4eCommerce, lembrar que é unha publicación
dixital especializada en comercio electrónico e mercadotecnia en
cuxas seccións recóllense novas de actualidade, estudos e análises
sobre as ditas temáticas. Por elas pasan cada mes, aproximadamente,
arredor de 20.000 usuarios. Dispón
de versión específica para o mercado mexicano.