Valve presenta a súa aposta polo hardware para 2026

Valve vén de dar conta da expansión da súa familia de dispositivos con tres novos produtos que chegarán a primeiros de 2026: a Steam Machine, o Steam Frame e o Steam Controller. Todos eles están deseñados para integrarse de forma nativa con SteamOS e ofrecer unha experiencia de xogo máis versátil, mantendo a filosofía de ecosistema aberto que caracteriza á compañía.
A Steam Machine preséntase como un PC compacto de alto rendemento, pensado para levar a biblioteca de Steam ao televisor ou a calquera espazo reducido. Cun tamaño aproximado de 160 mm, integra un procesador e unha GPU de clase desktop semi-custom de AMD, capaces de ofrecer xogos en 4K a 60 FPS con soporte para FSR. O dispositivo dispón de dúas configuracións de almacenamento, 512 GB e 2 TB, ampliables mediante microSD, e inclúe conectividade avanzada con Wi-Fi 6E, Bluetooth 5.3 e múltiples portos: DisplayPort 1.4, HDMI 2.0, USB-C e catro USB-A. A fonte de alimentación está integrada, evitando o uso de transformadores externos, e conta cun sistema de refrixeración silencioso.
O Steam Frame aposta pola realidade virtual sen cables. Trátase dun visor lixeiro con lentes pancake personalizadas e pantallas LCD de 2160 × 2160 píxeles por ollo, con taxas de refresco entre 72 Hz e 144 Hz. A transmisión sen fíos funciona cun adaptador de 6 GHz e dous receptores dedicados: un para o fluxo audiovisual e outro para a conexión Wi-Fi, garantindo estabilidade e ancho de banda. A innovación máis destacada é a transmisión foveada, que emprega seguimento ocular de baixa latencia para renderizar con maior detalle só a zona onde o usuario está mirando, multiplicando por dez a eficiencia de imaxe e de largo de banda. O sistema incorpora catro cámaras monocromáticas de alta resolución para o seguimento espacial e mandos con pancas analóxicas magnéticas, detección capacitiva dos dedos e compatibilidade total con SteamVR.
O Steam Controller, pola súa parte, regresa como complemento para toda a gama. Os novos mandos están deseñados para funcionar tanto con xogos convencionais como con experiencias de realidade virtual, mantendo a retrocompatibilidade coa biblioteca existente. Inclúen cruceta, botóns clásicos, pancas analóxicas de alta precisión e gatillos, ademais de ofrecer ata 40 horas de autonomía cunha única pila AA.
Con esta nova liña de hardware, Valve busca consolidar a súa posición como actor clave no mercado do PC de entretemento doméstico e da realidade virtual, aínda que para poder medir o impacto destes produtos no mercado falta por saber o detalle máis importante: o seu prezo.