Veciñanza de Cuntis reclama actualizar e profesionalizar a actividade web do Concello

martes, 18 de setembro do 2018 Fernando Sarasketa

A plataforma de cidadáns de Cuntis reunidos en Veciñanza (veciñanza.gal) vén de emitir un comunicado no que reclama un mellor servizo tecnolóxico do Concello, materializado a través da súa presenza na web local e máis nas redes sociais. Segundo explican dende Veciñanza, que vai dar corpo ás súas peticións nunha moción, cómpre “actualizar, coidar e profesionalizar” os ditos recursos dixitais da Administración local, abranguendo este proceso á renovación da web www.concellodecuntis.es (incluíndo o dominio galego, o .gal) e apostando “por un espazo de comunicación bilateral plenamente válido entre Administración e as veciñas e os veciños”.
Veciñanza tamén engade que a web "achega estatísticas de poboación con datos de 2008", que unicamente pon a disposición da cidadanía tres actas de pleno (“a última delas do ano 2009) e cuxa sección de transparencia fica “en construción”, amais de non fornecer, segundo sinalan dende a plataforma de veciños, “acceso directo á Administración Electrónica”.
Tamén critican, o feito de que o portal turismodecuntis.es presente no seu inicio un cartel de 2015, evidenciando que “está abandonado e xerando unha imaxe moi contraproducente para a promoción turística do municipio, que é exactamente o efecto contrario ao que se persegue cunha web destas características”, explican, engadindo que os perfís vencellados ao Concello de Cuntis nas redes sociais presentan, entre outras eivas, “grallas de ortografía, ausencia de criterio nas publicacións, falta de contido propio, etc”.

PUBLICIDADE