Vigo Global Summit ábrese este mércores poñendo o foco na economía nos tempos de IA

Vigo convértese a partir deste mércores, 12 de novembro, na capital do pensamento económico ao acoller a segunda edición do congreso internacional Vigo Global Summit, impulsado polo Consorcio da Zona Franca, o maior evento empresarial e económico da cidade, que recibirá a unha vintena de referentes internacionais do mundo da economía, a empresa, a política, o xornalismo e a análise internacional. E tamén das tecnoloxías máis avanzadas e da IA, por exemplo a investigadora do CITIC da UDC Amparo Alonso.
Con máis de 1.400 persoas rexistradas no Auditorio do Pazo de Congresos Mar de Vigo, a presenza confirmada de líderes de opinión e axencias internacionais e a condución da xornalista Mamen Mendizábal, a apertura do Congreso celebrarase ás 15.30 horas cun acto de inauguración no que intervirán o alcalde de Vigo, Abel Caballero o delegado do Estado da Zona Franca de Vigo, David Regades, e o presidente de Abanca, Juan Carlos Escotet.
A continuación, ás 16,00 horas terá lugar a conferencia maxistral de Dmitry Muratov, premio Nobel da Paz 2021, baixo o título A xeopolítica da verdade: O novo campo de batalla do poder global. Ás 16,45 horas celebrarase unha charla do premio Nobel coa condutora do Vigo Global Summit, Mamen Mendizábal. O ex presidente da Comisión Europea José Manuel Durão Barroso, intervirá ás 17,30 horas e manterá despois unha conversación sobre economía e xeopolítica co delegado do Estado da Zona Franca, David Regades.
Esta primeira xornada proseguirá coa mesa redonda O poder na era da interdependencia global fragmentada con Alicia García Herrero, economista xefe para Asia Pacífico en Natixis; Brian Wong, profesor da Universidade de Hong Kong; Ángel Talavera, economista xefe para Europa de Oxford Economics e María Lorca-Susino, profesora da Universidade de Miami.
A última intervención do primeiro día do congreso será ás 19,10 horas e terá como protagonista á campioa olímpica e Premio Princesa de Asturias 2024, Carolina Marín que pechará a xornada cunha charla inspiradora acompañada do presidente da axencia EFE, o xornalista Miguel Ángel Oliver.
O xoves, o Vigo Global Summit arrincará ás 9,15 horas coa apertura institucional a cargo de Emma Gómez, directora xeneral de APD (Asociación para o Progreso da Dirección. Tras a inauguración, será a quenda de Amparo Alonso, catedrática de Ciencias da Computación e Intelixencia Artificial pola UDC e investigador do Centro de Investigación TIC, o CITIC, cunha conferencia maxistral titulada Máis aló do algoritmo: Intelixencia Artificial con propósito humano. Tras ela, manterá unha conversación inspiradora con Antón Costas, presidente do Consello Económico e Social de España: Tecnoloxía, produtividade e cohesión: cara a un novo contrato social.
A continuación, celebrarase unha mesa redonda sobre o Liderado na era da dixitalización: Economía, traballo e sociedade en transformación, con Inés Bermejo, directora xeneral de Iberia HP e Javier Sesma, vicepresidente sénior de Desenvolvemento Empresarial Global en Thyssenkrupp Elevator Innovation Center.
Ás 12.15 horas será a quenda do premio Nobel de Economía 2024, Daron Acemoğlu, co seu relatorio O progreso nun punto de inflexión: Tecnoloxía. Poder e os desafíos globais, que se centrará en como as tecnoloxías e a IA transforman a forma de traballar, e compartirá as súas teorías sobre como inflúen na produtividade e a desigualdade segundo sexan aplicadas no traballo. Do mesmo xeito que con Muratov, a xornalista Mamen Mendizábal charlará tamén co premio Nobel de Economía, ao termo do seu relatorio.
Vigo Global Summit celebrará pola tarde, ás 18.30 horas, o peche cultural do Congreso, no que intervirá o actor e humorista Carlos Blanco cun monólogo (19.15 horas). A continuación, celebrarase a actuación de Baiuca (19.50 horas) e o espazo gastronómico Vigo Taste Hall (20.30-21.30 horas). Durante as dúas xornadas tamén participará Marcos Puhinger, artista urbano vigués que pintará en directo varias pezas sobre o que ocorra no congreso.
Este ano Vigo Global Summit incorporou como entidades colaboradoras a APD (Asociación para o Progreso da Dirección), Abanca e Conxemar. Ademais, Stellantis and You participa como vehículo oficial.