Vigo abre web sobre a súa arte na rúa
mércores, 12 de xullo do 2017
O Concello de Vigo vén de pór en marcha unha
nova web informativa, ciudaddecolor.vigo.org,
sobre a campaña de arte na rúa Vigo, Cidade de Cor, que
vai pola súa terceira edición. A
páxina foi dada a coñecer polo rexedor, Abel Caballero, e pola
tenente de alcalde, Carmela Silva. Segundo puidemos saber, a
páxina ten autonomía propia malia estar ligada á dita iniciativa
de arte urbana, sendo a faciana visíbel da mostra pero, tamén, dun
xeito de crear e de remodelar as feituras externas das cidades que é
en si mesmo unha revolución estética, urbanística e
arquitectónica. Na páxina pódese acceder a toda a información do
proxecto, en palabras do alcalde “unha mostra do talento de
artistas xa consolidados e unha oportunidade de dar a coñecer na
cidadanía o traballo de artistas noveis”.
Caballero confirmou que, dado o éxito acadado por
esta campaña de embelecemento dos espazos urbanos, esta terá
continuidade en futuras edicións marcándose como obxectivo chegar a
cifra de 100 obras nos próximos anos.
Estas obras estarán
firmadas por diferentes artistas locais e nacionais como: Delio
Rodríguez, María Romero, Pinche, Maria Jose Pulido. Teresa
Irisarri, Silvia Rodríguez Pena (SAX), Noel Peres Fungueiriño,
Elara Elvira e Ana Santiso, Iria Blanco e Pedro Sardiña. Ademais
nesta edición haberá dous artistas internacionais convidados: Hazul
e Mona Car o que demostra o éxito internacional desta iniciativa.
O
alcalde tamén anunciou que todos os murais que se levan feito nas
dúas anteriores edicións e os de esta terceira recibirán un
tratamento especial para garantir a súa preservación e preservar
así un bo estado de conservación "durante alomenos 100
anos".
Caballero e Silva destacaron tamén que esta
nova web, dispoñíbel en galego, español e inglés, ten como
obxectivo dar a coñecer tanto os cidadáns de Vigo como a quen nos
visitan toda a información das obras, da súa localización exacta,
e os datos das artistas e os artistas que as asinan.