Vilagarcía acolle un curso de verán da USC para mellorar a empregabilidade da xuventude con coñecemento TIC

O Grupo de Investigación Esculca, da USC, coa colaboración das Concellerías de Xuventude e Educación do Concello de Vilagarcía de Arousa, organiza o curso de verán A formación e o emprego da xuventude nun mundo dixital, dirixido a permitir que a mocidade local suba nova novos chanzos en materia de capacitación tecnolóxica, con vistas a mellorar a súa empregabilidade. Celebrarase os días 18, 19 e 20 de xullo de 2023 no Auditorio de Vilagarcía, en horario de mañá e tarde.
A actividade formativa conta con 150 prazas e está aberta a todo tipo de público. A matrícula ten unha cota xeral de 70 euros e outra bonificada, a 40 euros, para estudantes, persoas desempregadas, pensionistas e membros da asociación de antigos alumnos da USC. As persoas interesadas poden inscribirse ata o 7 de xullo a través da web da USC.
Segundo informan fontes do Consistorio, “este novo curso da USC pon de manifesto un ano máis a firme vocación universitaria que ten Vilagarcía, concello que xa hai décadas é sede oficial dos cursos de verán desta institución académica e no que, dende hai tres, tamén do programa IV Ciclo para a formación das persoas maiores de 50 anos”.
Nun plano máis concreto os obxectivos desta actividade formativa son “comprender os principios e procesos que rexen o uso das redes sociais no mundo das profesións actuais; coñecer as bases da comunicación dixital e a súa aplicación práctica en diferentes contextos profesionais; analizar a importancia do autocoñecemento do perfil profesional na promoción da empregabilidade e concienciar sobre a relevancia da formación en competencias transversais como elemento clave na mellora da empregabilidade”.
A actividade tamén persegue “formar na busca, consulta e candidatura a ofertas de traballo a través de Internet, aprendendo a deseñar un perfil profesional online; reflexionar sobre as vantaxes do uso das novas tecnoloxías para mellorar a empregabilidade e identificar diferentes plataformas e redes sociais onde explorar posibilidades laborais axustadas ao perfil profesional”.
Os contidos desenvolveranse mediante relatorios e mesas redondas nas que intervirán expertos, docentes e responsábeis políticos e do sector empresarial. Amais, celebraranse obradoiros nos que os alumnos poderán aprender de forma máis práctica algúns dos conceptos e técnicas expostos.
O curso ten unha duración de 18 horas lectivas e permitirá aos asistentes obter 1 crédito ECTS.