Vitae e Javier Garzás achegan a cuarta edición do Curso Product Owner Axilidade Avanzada
martes, 3 de maio do 2022
Vitae
Consultores non baixa o listón de actividade esta primavera:
actividade dirixida a múltiples frontes pero todas elas compartindo
o nexo común de completar e actualizar o noso coñecemento e a nosa
formación avanzada. Sen ir máis lonxe esta primavera volve o Curso
Product Owner Axilidade Avanzada, cuarta edición. Será
novamente impartido por un dos grandes expertos actuais do panorama
tecnolóxico galego e estatal: Javier Garzás.
O
obradoiro, de oito horas de formación e con opción para obter o
certificado Scrum Manager (proporcionando 70 PDA), celebrarase os
días 30 e 31 de maio e o máis o 1 de xuño, a través da aula
virtual de Vitae Consultores, que explica (para poñernos en
situación) que a figura do Product Owner é un concepto que
designa o profesional que nas contornas áxiles representa o último
responsábel do éxito do desenvolvemento dun produto e quen se ocupa
de que un equipo de traballo aporte o máximo o meirande valor ao
negocio.
Os obxectivos desta actividade formativa pasan por
afondar nas técnicas e ferramentas específicas desta figura
profesional, moi ligada aos novos xeitos de traballo eficientes,
eficaces, rendíbeis, sustentábeis e intelixentes. Amais, farase un
repaso polas leccións aprendidas, as experiencias e as
recomendacións de ter participado en ducias de implantacións deste
tipo de metodoloxía.
O curso, segundo informa Vitae,
corresponde a unha ampliación doutra actividade formativa achegada
pola consultora galega: Xestión Áxil de Proxectos con Scrum. Está
dirixido principalmente a directivos, xefes de proxecto, product
owners, expertos en Scrum, responsábeis de calidade,
responsábeis de mellora de procesos software, consultores,
avaliadores, auditores informáticos, persoal de xerencia media e
técnica da área das tecnoloxías da información e profesionais en
xeral do sector TIC.
A persoa encargada de impartir os contidos
é Javier Garzás, doutor cum laude e enxeñeiro superior en
Informática. Con estudos post-doutorais e investigador convidado na
Universidade Carnegie Mellon dos Estados Unidos (onde desenvolveu
tarefas de investigación en metodoloxías áxiles), é experto en
equipos profesionais e en recursos innovadores para a materialización
de proxectos avanzados. Até o de agora ten axudado a máis de 80
empresas a mellorar os seus procesos de xestión e traballo. É
profesor titular na Universidade Rei Juan Carlos. Adícase a axudar a
empresas que fagan mellor software (en tempo, con produtividade, con
calidade e con felicidade). É autor do blog javiergarzas.com,
que conta cunha media de 2.500 visitas diarias.