Vitae e Víctor Salgado mostran nun curso como garantir unha IA segura e útil na nosa empresa

Vitae Consultores organiza este mes de maio un curso formativo sobre IA segura nas empresas que será impartido por un dos grandes expertos galegos (e estatais) na confluencia entre o tecnolóxico, o legal e o xudicial: o avogado Víctor Salgado, colaborador habitual de Código Cero e socio do bufete Pintos & Salgado, do que é co-fundador. Estamos a falar do curso Uso da IA sen riscos: marco legal para RR HH e a empresa. Desenvolverase os días 12 e 14 de maio, e terá seis horas de duración. As sesión serán gravadas para que as persoas asistentes poidan consultalas de xeito ilimitado unha vez rematadas.
Vitae e Víctor Salgado explican que a intelixencia artificial está a incorporarse rapidamente a procesos empresariais como a selección de persoal, a avaliación do rendemento ou a toma de decisións, pero, con todo, “o seu uso expón importantes implicacións xurídicas en materia de protección de datos, dereitos fundamentais, discriminación e responsabilidade empresarial”.
Este curso ofrece unha visión clara e práctica do marco legal con aplicación á IA na empresa, con especial atención ao Regulamento Europeo de Intelixencia Artificial, o RGPD e a normativa laboral, proporcionando criterios para utilizar estas ferramentas con seguridade xurídica.
Os obxectivos da actividade formativa son comprender o impacto da IA na contorna empresarial, coñecer o marco normativo aplicable á IA, identificar as implicacións legais do uso da IA en Recursos Humanos, aplicar criterios de cumprimento en protección de datos e xestión de riscos e adquirir pautas prácticas para o uso consciente e seguro da IA na empresa.
A persoa encarga de impartir os contido será Víctor Salgado, avogado especializado en dereito dixital, protección de datos, ciberseguridade e regulación tecnolóxica desde hai máis de 25 anos.
É socio director do bufete de avogados Pintos & Salgado, firma de referencia en Dereito TIC, profesor de Dereito Informático e relator habitual en foros académicos e profesionais sobre Internet, protección de datos e intelixencia artificial. Conta cunha traxectoria de especialización nestas materias desde 1997, formación avanzada en RGPD e intelixencia artificial e diversas certificacións e recoñecementos profesionais no ámbito xurídico-tecnolóxico.