Vitae e o CPEIG achegan en novembro un evento gratuíto sobre como formar os mellores equipos profesionais TI

O Colexio Profesional de Enxeñaría en Informática de Galicia (CPEIG) e Vitae Consultores organizan este mes de novembro un evento formativo de balde: un curso intensivo sobre Avaliación, Sección, Captación e Retención de Perfís TI. Trátase, en palabras das entidades organizadoras, “dunha oportunidade para acadarmos unha visión clara dos Recursos Humanos e da psicoloxía do traballo”. A cita será o vindeiro xoves 23 de novembro, en horario de 18.00 a 20.00 horas. Será no Hotel Porta do Camiño de Santiago de Compostela.
Quen precise máis información sobre o evento ou formalizar as inscricións pode facelo a través da conta informacion@cpeig.gal. Os contidos serán impartidos por Marcos Carbonell, socio director da consultora tecnolóxica galega Vitae.
Segundo informan as entidades organizadoras poñéndonos en situación sobre a temática do curso, “nin o modelo económico capitalista, nin o comunista, nin o socialista e nin o liberal conseguiron o que conseguiron os e as profesionais informáticos: teletraballo, flexibilidade horaria, semanas laborais de 4 días, autonomía, autorganización, altos salarios, capacidade de elección de empresas e proxectos adaptados aos diferentes perfís e intereses, formación, beneficios sociais, etc...”. Sobre esta base temática, o evento exporá as claves para seguir garantindo e mellorando estes logros, un proceso que pasa de xeito inevitable por acadar os máis óptimos equipos. Estas claves axudarannos a seleccionar e captar aos máis indicados profesionais para a nosa empresa, e amosarán como retelos, motivalos e avalialos dende dous puntos de vista: o científico (que nos proporciona a psicoloxía do traballo) e o punto de vista dos Recursos Humanos (RRHH), é dicir, do día a día, “pois con só cun punto de vista non se poderán conseguir resultados fiables nin perdurables no tempo”, informan Vitae e o CPEIG.
A actividade formativa virá da man de Marcos Carbonell, profesional con máis de tres décadas de experiencia nos sectores do deporte, as novas tecnoloxías e os recursos humanos. Carbonell é diplomado en Empresariais, máster en Recursos Humanos e posgrao en Marketing e en Organización de Empresas. Dende 2006 é socio director de Vitae Consultores e tense responsabilizado, directa ou indirectamente, de máis de 1.000 procesos de selección cunha taxa de máis dun 90% de éxito.