Vitae formará a importantes empresas de Galicia en programación web avanzada
xoves, 16 de febreiro do 2017
Nos vindeiros meses a
consultora Vitae, especializada en fornecer formación
tecnolóxica avanzada, dará comezo a unha nova andaina no seu labor
de posta a punto e actualización dos nosos coñecementos sobre
tendencias, recursos e ferramentas dixitais. Será, en palabras da
consultora galega, unha etapa importante no labor formativo de seu,
xa que porá de manifesto a confianza que teñen as nosas empresas e
organizacións galegas na eficacia e potencialidade dos seus
obradoiros. Nesta nova andaina de Vitae, de feito, participarán
importantes compañías e entidades da nosa terra, poñendo en mans
da consultora a formación dos seus profesionais en programación web
avanzada.
Neste ámbito, Vitae amosará os
segredos de ferramentas como como Angular2, que ten vocación de saír
do navegador e conquistar os servidores, escritorios e teléfonos
móbiles; React, desenvolvida e mantida por Facebook e mergullada un
proceso de rápido crecemento; ou Ionic2, que segundo sinala Vitae “é
con moita diferenza o SDK (nas súas siglas en inglés, kit de
desenvolvemento de software) de xeración de aplicacións móbiles
multiplataforma máis utilizado no mercado”.
Ademais, a consultora galega afondará
en técnicas de investigación e captura de requirimentos xunto con
responsábeis de departamento e xefes de proxecto para mellorar a
efectividade á hora de tratar con clientes e/ou usuarios.
Na liña do mencionado, Vitae fai
saber que unha Universidade galega vén de solicitarlle formación e
asesoramento no ámbito da xestión de servizos TI, unha disciplina
que ten como obxectivo sentar os alicerces para a atención axeitada
das necesidades dos usuarios dos servizos dixitais. E faino
establecendo canles e regras básicas para a atención, a partir de
definicións compartidas entre usuarios e técnicos dos conceptos de
servizo, incidencia, petición, autorización, etc. “Todo isto”,
explica Vitae, “utilizando como referencia un modelo de boas
prácticas na xestión das TI”.
Todo o devandito confirma que Vitae
continúa coa súa misión de mellorar a formación e capacitación
dos nosos profesionais e empresas no sector das novas tecnoloxías
centrándose na mesma medida nos aspectos humanos e organizativos que
nos aspectos tecnolóxicos.