Vitae introdúcenos nos importantes cambios da versión 6 de PMBOK
martes, 22 de maio do 2018
Vitae Consultores vai organizar na Coruña un
obradoiro moi indicado para as/os nosas/os profesionais que se adican
á dirección de proxectos tecnolóxicos e avanzados. En concreto, o
obradoiro serviralles de axuda e complemento perfecto para optimizar
xestión, desenvolvemento e, por suposto, resultados. Estamos
a falar do curso en aberto Xestión de Proxectos con PMI: Novidades
no PMBOK 6, que se desenvolve os días 22 e 23 de xuño na Coruña
(Hotel Attica 21) ao longo de 10 horas de formación e adestramento.
A actividade, que proporciona 10 PDU (Unidades de
Desenvolvemento Profesional) por parte do Project Management
Institute (PMI), consistirá en liñas xerais nun repaso
pormenorizado pola nova versión (a sexta) da guía do PMBOK (Project
Management Body of Knowledge), elaborada polo devandito PMI.
O PMBOK, para quen non o saiba, vén sendo o
referente en dirección de proxectos máis relevante a nivel mundial,
segundo nos conta Vitae, que pon o foco nas súas posibilidades pero
tamén na súa rápida evolución, suxeita a unha manchea de cambios
continuos que esixen da nosa parte procesos de actualización. Estes
cambios na nova versión da guía do PMBOK, a sexta, convértena na
escolma de boas prácticas máis completa e pedagóxica das que temos
hoxe en día á nosa disposición dentro do seu eido de actividade,
“referendando a súa posición de primeira referencia mundial”,
explica Vitae.
Ao fío destas incorporacións, a consultora porá
o foco (durante o curso) nas referencias a metodoloxías áxiles,
cambios de procesos e actualizacións de procedementos relevantes,
entre outras cuestións. Na sesión, engade Vitae, realizarase polo
tanto unha revisión do PMBOK en xeral para aqueles que descoñecen o
seu contido e poidan comprender as novidades que poñen en xogo as
súas versións.
O curso está dirixido principalmente a directores
de proxectos ou ben a todos aqueles profesionais que desexen
adicarase á xestión de proxectos.
O temario inclúe unha introdución ao PMBOK
(revisión de todas as áreas de coñecemento e dos seus
correspondentes procesos de xeito que todos os asistentes “teñan
unha idea nidia e xeral do seu contido”), unha revisión dos novos
procesos (con especial mención aos procedementos que irrompen nesta
nova actualización), un repaso polos cambios significativos en
áreas, procesos, terminoloxía e ferramentas, e, por último, un
capítulo adicado a metodoloxías áxiles no PMBOK (cunha explicación
práctica destas metodoloxías, incluíndo unha introdución a Scrum
para establecer as relacións co PMBOK).
O encargo de impartir estes contidos será Javier
Rosa, enxeñeiro industrial pola Universidade Carlos III Profesional.
No seu amplo currículo figuran un programa de desenvolvemento
directivo polo IE e un MBA pola AEDE Business School. Actualmente
está a cursar a licenciatura de Económicas. Ten ás súas costas 20
anos de experiencia en dirección de operacións e de proxectos, e
traballos de consultoría e xestión de servizos en diversos
sectores. Leva impartindo formación relativa á xestión de
iniciativas tecnolóxicas e operacións máis de 9 anos na
Universidade Carlos III de Madrid, así como noutras institucións
académicas superiores, escolas de negocios e empresas de diferentes
eidos de actividades. Foi coordinador de PMO en Accenture e ten
asesorado e formado a empresas e organismos como EADS Casa, Eulen,
Repson, ISDEFE, Dragüer, Línea Directa, Técnicas Reunidas, ATOS,
Prosegur, Plexus, ESI, AE, COIIM, AEA, GSF, AEDE, Universidade
Francisco de Vitoria e a Universidade Rey Juan Carlos, entre outras.