Vivaces e Rural Hackers impulsan un hackathon para transformar a xestión da auga dende Anceu

Vivaces, alianza de entidades que traballan polo impulso do medio rural, colabora entre os próximos días 1 e 7 de setembro en Anceu (Pontevedra) en Hackers Days 2025, un evento que reunirá a equipos de desenvolvemento, persoas expertas en tecnoloxía e a comunidade local para, segundo indica Vivaces, “crear unha plataforma dixital de código aberto que responda a un dos grandes retos invisibles do rural: a xestión comunitaria da auga”.
A alianza lembra que en moitas aldeas esta xestión recae aínda sobre persoas voluntarias que, sen ferramentas dixitais, dedican ata 400 horas anuais a manter o sistema en funcionamento.
A previsión é que máis de 1.500 aldeas poidan beneficiarse da solución na que se traballará durante estas xornadas.
A ferramenta estruturarase en tres bloques. O primeiro deles, será o rexistro integral. Trátase dun sistema intuitivo para dixitalizar incidencias, analíticas da auga, consumos individuais e datos de provedores, todo nun único espazo compartido e ordenado.
O segundo será un calendario de mantemento e control. Consiste nunha axenda con recordatorios automatizados que permitirá organizar analíticas, reparacións e informes de forma anticipada e eficiente.
Finalmente, comprenderá un repositorio documental centralizado; un arquivo dixital común onde conservar a documentación relevante para trámites, auditorías ou o traspaso de responsabilidades a novas persoas xestoras.
A colaboración de Vivaces traducirase na participación de Juan Manuel Rodríguez, director executivo (CEO) de SiteGround e membro do comité executivo da alianza, no grupo de expertos, así como na difusión das súas conclusións por medio, entre outras accións, dun episodio especial de La España Medio Llena. Neste episodio, Pablo Maderuelo, director do comité executivo de Vivaces e director do podcast, desprazarase ata Anceu para poder ser testemuña en primeira persoa das principais claves do traballo realizado en conversación cos seus promotores e participantes. “En Vivaces temos o compromiso de visibilizar as oportunidades que ofrece no medio rural e de desenvolver proxectos que contribúan a crealas. Estou seguro de que estes días de convivencia e colaboración afianzarán este obxectivo compartido”, sinala Juan Manuel Rodríguez.
Rural Hackers
Hacker Days é unha alianza impulsada por Rural Hackers que conecta a entidades tecnolóxicas, comunidades rurais e axentes do territorio para deseñar solucións dixitais con impacto local. Nesta edición, o evento tamén conta co apoio de SiteGround, Elevar Yellow, Anceu Coliving, Next Dixital e firma tecnolóxica galega Teimas, así como coa colaboración de Adopta un Júnior e a axencia Viko.
Rural Hackers é unha organización con base en Anceu, un pobo de 97 habitantes en Galicia, que impulsa residencias tecnolóxicas e artísticas en contornas rurais. Cun enfoque internacional, conecta innovación aberta, desenvolvemento de software e experimentación creativa cos retos do medio rural. A súa actividade inclúe a creación de prototipos, ferramentas dixitais e hackathons colaborativos que exploran novas formas de revitalizar territorios afectados polo despoboamento.
Vivaces é unha alianza composta por empresas -Amazon, Bayer, EY, BlaBlaCar, Booking.com, SiteGround, Nickel, Grünenthal, Danone, Harmon e a axencia EFE como socio de comunicación- que están a traballar de forma coordinada co obxectivo de visibilizar o potencial do medio rural. IDEL, IVS, SECOT, Foro NESI, TuTechô, Mayumaná e Néxodos son, así mesmo, socias colaboradoras do proxecto.