Vivo presenta o seu smartphone encartable

O fabricante chinés Vivo vai competir con Samsung no reducido mercado dos smartphones encartables co Vivo X Fold, un dispositivo moi prometedor, cun formato moi semellante ao do Samsung Galaxy Z Fold3, aínda que prometendo incluso unha maior resistencia da súa pantalla encartable (capaz de soportar 300.000 encartes) e optando po un lector de impresións dixitais en pantalla (cando os competidores optan por integralo no botón de acendido).
O Vivo X Fold ten unha pantalla OLED Full HD+ de 6,53 polgadas na súa parte exterior, cunha relación de aspecto 21:9, mentres que a súa pantalla encartable OLED ten unha diagonal de 8,03 polgadas, soportando ambas pantallas unha velocidade de refresco de 120 Hz.
Este novo smartphone funcionará cun procesador Qualcomm Snapdragon 8 Gen 1, a súa batería terá unha capacidade de 4.600 mAh con carga rápida de 66 watts por cable (podendo así cargarse completamente en 37 minutos) ou 50 watts sen fíos (e 10 watts de carga inversa). A súa cámara traseira cuádrupla ten un sensor principal de 50 Mpíxeles, un ultra grande angular de 48 Mpíxeles, un teleobxectivo 2x de 12 Mpíxeles e unha cámara periscópica 5x de 8 Mpíxeles. As súas pantallas integran cámaras frontais de 16 Mpíxeles.
O Vivo X Fold venderase en China a un prezo de 8.999 iuans (1.299 euros) con 12 GB de RAM e 256 GB de almacenamento, existindo tamén un modelo con 512 GB de almacenamento por 9.999 iuans (1.444 euros). Polo momento non hai plans de que este smartphone vaia ter distribución global.