Vodafone dirá adeus ás redes de cobre no verán

xoves, 7 de marzo do 2024 Marcus Fernández

Aínda que Telefónica fixou n o19 de abril o peche definitivo das súas centrais de cobre (coincidindo co seu centenario), outras compañías teñen outras datas para a súa despedida do ADSL, e Vodafone España anuncia que será no verán cando completará o apagamento e desmantelamento total das 1.108 centrais de ADSL que aínda ten.
O adeus ao cobre supón que os usuarios teñen cobertura de fibra óptica, o que ofrece un servizo moi superior, e tamén supón un importante aforro enerxético (estiman que reducirían a demanda de enerxía en 64,41 GWh ao ano).
Dentro desta iniciativa de modernización Vodafone tamén substituíu os seus sistemas de alimentación ininterrompida e equipos de enerxía máis antigo e adoptou tecnoloxías máis eficientes (como a posibilidade de realizar chamadas de voz a través de 4G e Wi-Fi).
Vodafone tamén prevé que a súa rede móbil poida mellorar a súa cobertura 5G até chegar ao 82% da poboación e a un total de 2.700 municipios a finais do presente ano, superando as obrigas de despregadura contraídas.

PUBLICIDADE