Vodafone e Down Pontevedra lanzan iniciativa pioneira de inserción laboral
venres, 28 de xullo do 2017
Os días pasados
presentouse no Pazo de Mugartegui en Pontevedra unha iniciativa de
networking directamente encamiñada a ceibar de obstáculos o
camiño das persoas con síndrome de Down cara as empresas da nosa
contorna. Trátase
de Enreda2, un proxecto que vén da man de Xuntos (Down Pontevedra) e
a Fundación Vodafone España e que inclúe entre as súas grandes
liñas de traballo a de xuntar (precisamente) ás empresarias e aos
empresarios da contorna con rapazas e rapaces no. Para
materializar as súas propostas, Enreda2 abrangue encontros, xeiras
de traballo compartido e faladoiros, amais da formulación de
diversos xogos. A través desta iniciativa, o empresariado pode
coñecer de primeira man as vantaxes de contar nas súa fileiras con
mozos do devandito colectivo. Enreda2 insírese nun proxecto máis
amplo, estatal, para loitar contra as fendas sociais e de
empregabilidade a través das TIC.
Para presentar esta
iniciativa estiveron presentes a deputada de Cohesión social e
Xuventude, Digna Rosa Rivas Gómez; a técnica de Benestar Social e
Deportes, Patricia González; o responsábel de Administracións
Públicas de Vodafone España en Pontevedra, Severino Castromán; e o
presidente de Down Pontevedra Xuntos, Manuel Pérez Cabo. Todos eles
coincidiron en subliñar a importancia das novas tecnoloxías como
facilitadoras de inserción laboral e como vehículos para a xeración
de oportunidades de emprego en colectivos en risco de exclusión.
Neste senso, Patricia González lembrou que “Down Pontevedra aposta
pola formación en novas tecnoloxías co fin de posibilitar que as
persoas con diversidades de calquera índole desempeñen postos de
traballo nos que hai anos estaban practicamente excluídos”.
Tamén salientaron que
Enreda2 xorde directamente dunha proposta de alcance estatal, o
proxecto de formación prelaboral Yo me me prep@ro, cuxo
obxectivo é proporcionar a esta mocidade “as ferramentas e
estratexias precisas en aspectos clave como o uso axeitado das TIC,
ou sexa, programas informáticos, navegación por Internet, acceso a
redes bancarias informatizadas ou aplicacións móbiles”. E todo,
engaden dende Xuntos, “co obxectivo de axudarlles a salvar a fenda
dixital que lles condiciona enormemente á hora de atopar un posto de
traballo, o que supón unha seria traba ás súas aspiracións de
mellorar a súa autonomía e levar unha vida o máis plena e
independente posíbel”.
Na cita tamén se fixo
saber que este ano están a recibir na provincia de Pontevedra a
devandita formación prelaboral en novas tecnoloxías 8 persoas
usuarias de Down Pontevedra Xuntos, que “adquiren as competencias
necesarias para poder desempeñar un posto de traballo coa
normalidade e eficacia de calquera empregado ou empregada”.
Este alumnado de
Pontevedra sumarase a outro en diversas provincias, alcanzando un
total de 240 mozos e mozas que recibirán esta formación en toda
España. En total, engadiuse, serán 10.500 horas docentes apoiadas
en vídeo-titoriais sobre o uso avanzado da Internet, a xestión do
correo electrónico ou o manexo redes sociais como LinkedIn, entre
outras habilidades.
Este ano, o proxecto vai
pola súa terceira edición. Desde a súa posta en marcha en 2014, e
“malia complicadas condicións do mercado de traballo”, este
programa conseguiu 222 contratos para mozos e mozas con síndrome de
Down.
A realización deste
proxecto enmárcase dentro do convenio marco subscrito o 8 de
novembro de 2013 entre Fundación Vodafone España, Plena Inclusión
e Down España para a realización de actividades conxuntas en
materia de accesibilidade e inserción laboral.