Vodafone e Huawei impulsan a fechadura intelixente baseada en IoT
mércores, 17 de outubro do 2018
Vodafone
segue a dar pasos firmes no eido dos obxectos conectados, un dos
ámbitos nos que a compañía está (sen dúbida) está a centrar
máis e mellores esforzos. Se
os días pasados falamos do incremento da súa cobertura IoT para
cidades estatais, hoxe a compañía desvelou os detalles dun
enxeño concreto que nos axuda a comprender os miúdos detalles que
abrangue o universo IoT (Internet of Things) e, tamén, as
súas posibilidades para o noso quefacer diario. Trátase dunha
tecnoloxía que subministra acceso sen chave ás portas do noso
fogar, local hostaleiro ou empresa. Sen chave e co engadido extra de
ser “segura, cómoda e estar baseada na análise avanzada de
datos”. O enxeño de fechadura intelixente foi deseñado por
Vodafone, Huawei e Top Dixital.
En
troques de chave, o que se precisa é un teléfono móbil, o que
segundo informa a operadora é de especial interese para os usuarios
dos hoteis e tamén para administradores de propiedades. A solución,
comercializada en España por Vodafone con Top Dixital como socio,
ofrece diferentes tipos de apertura a través de NB-IoT, segundo
informan estas empresas “doadas de instalar e moi adaptábeis ás
necesidades e preferencias dos clientes”.
O
enxeño de fechadura intelixente, desenvolvido por Vodafone e Huawei,
integra a tecnoloxía NB-IoT, o que permite a súa instalación
dentro de edificios e sotos, mesmo cando hai un sinal de cobertura
feble, o que garante a transmisión de datos. Esta tecnoloxía
elimina o Wi-Fi e o Bluetooth, e mellora a conectividade, o que
redunda, segundo inciden as dúas empresas, nun menor gasto de
enerxía e nunhas meirandes confiabilidade e seguridade. Amais da
tecnoloxía NB-IoT, a tecnoloxía resultante habilita a solución E2E
coa plataforma Huawei OceanConnect IoT.