Vodafone impulsa unha tecnoloxía espacial para estender a cobertura móbil
mércores, 4 de marzo do 2020
A
plataforma de contidos Rakuten e a operadora de telecomunicacións
Vodafone veñen de unir forzas para mellorar a cobertura móbil
arestora dispoñíbel e estendela a máis persoas, dispositivos e
lugares. E fixérono converténdose nos principais investidores dunha
venture destinada a fortalecer as comunicacións mediante a
que sería, en palabras das dúas empresas, “a primeira rede de
banda larga móbil que transmitirá dende o espazo”. Trátase
da tecnoloxía espacial de AST & Sciencie.
A
primeira conexión directa con smartphones convencionais
levarase a cabo a través da tecnoloxía de órbita terrestre baixa
(LEO) e rede satelital de baixa latencia de AST & Science,
coñecida como SpaceMobile.
O
obxectivo é fortalecer, precisamente, a tecnoloxía SpaceMobile que,
será “especialmente relevante para o mercado móbil mundial, que
xera xa un billón de dólares anuais”, explica Vodafone, engadindo
que grazas a ela, “eliminaranse os problemas de cobertura que
experimentan hoxe en día os cinco mil millóns de clientes que
sofren cortes de conectividade diarios”.
Asemade,
a operadora salienta o seu potencial para acadar que as comunidades
que contan cun servizo máis precario teñan acceso, antes do
previsto, “aos últimos servizos móbiles e poidan, así, ter
acceso á economía dixital”.
AST
& Science ofrecerá inicialmente servizos 4G a redes asociadas de
todo o mundo e no futuro ofrecerá 5G. A rede de SpaceMobile
facilitará a conectividade en itinerancia (roamin) desde e
cara a redes móbiles terrestres cunhas tarifas de datos semellantes
e sen necesidade de implementar equipos de satélite especializados.
Ademais
do investimento realizado en AST & Science, Vodafone asinou unha
alianza estratéxica para achegar os seus coñecementos técnicos,
operativos e regulamentarios no despregue global de SpaceMobile.