Vodafone mellora a app do sistema de bicicletas compartidas de Barcelona
xoves, 23 de abril do 2015
Optar
por novas canles de transporte, deixando nun segundo termo os nosos
vehículos cómodos mais altamente contaminantes foi un dos alicerces
da creación de Bicing, o
sistema de bicicleta compartida da cidade de Barcelona, inaugurado en
2007. Trátase dun servizo que coida o medio ambiente converténdose
nun complemento ideal ao transporte público. Visto o auxe deste
dispositivo, Barcelona de Serveis
Municipals (B:SM), a empresa de publicidade Clear
Channel e Vodafone veñen de presentar a nova versión de
aplicación para móbiles do servizo Vodafone
Bicing, baseada no concepto da gamificación
(ou uso de técnicas propias dos xogos e o lecer en actividades non
recreativas para converter unha actividade pouco atractiva en algo
que motive á persoa a participar nela, como sería premiar con
insignias certos logros ao longo da actividade).
A app,
que se presenta aos usuarios con feitura de xogo, premia as condutas
saudábeis e sustentábeis que colaboran co medio ambiente e fomenta
a realización de actividade física. Á vez, dá a oportunidade aos
usuarios de divertirse co servizo e de conseguir diversos agasallos
por empregalo, como accesorios de bicicleta ou activos de Vodafone
Bicing (abonos, viaxes da modalidade eléctrica, etc.).
Esta nova aplicación,
dispoñíbel para iPhone e Android, avalía os desprazamentos
sustentábeis de cada usuario, e cuantifica 3 parámetros da viaxe en
función do peso e a idade do usuario: os gramos de CO2 aforrados, as
calorías queimadas e o nivel de felicidade, que se mide segundo o
nivel de endorfinas liberadas despois de facer unha actividade
saudábel. Por cada viaxe, segundo estas 3 variábeis, e segundo a
tipoloxía da viaxe (subida ou baixada, máis longo ou máis curto,
etc.) o xogo dará un máximo de puntos mensuais a cada xogador, que
poderá trocar por diferentes agasallos.
Asemade, a app achega
información sobre cal foi a última ancoraxe de cada usuario, o que
permite verificar a correcta devolución da bici na última viaxe
realizada. Para fomentar o correcto uso do servizo, daranse puntos
adicionais cando se consulte esta información. Amais disto, os
usuarios poden consultar as estatísticas completas da súa
actividade en calquera intre a través da propia aplicación.
A app ten diferentes
niveis. No nivel I, Vodafone Bicing irá lanzando diferentes retos
aos usuarios, por exemplo acadar un nivel determinado de aforro de
gramos de CO2. Estes retos faranlles gañar puntos extras, e non
terán un límite de tempo, o que permitirá aos xogadores ir ao seu
ritmo e familiarizarse así co xogo. A medida que o usuario vaia
avanzando e gañando puntos, subirá ao nivel II, e será nesta
segunda fase cando se introducirá no xogo un factor competitivo con
outros usuarios. Para poder entrar no xogo, os participantes deberán
comezar a sesión da mesma maneira, como o fan cando entran na súa
zona de usuarios na web, empregando o mesmo nome de usuario e
contrasinal.
Alén das novidades, a
app Vodafone Bicing mantén todas as funcionalidades actuais: unha
listaxe das estacións, o mapa que as sitúa e indica a
dispoñibilidade de bicis e ancoraxes, e a posibilidade de marcar
estacións preferidas. A finais de maio, está previsto que estea
dispoñíbel o novo planificador de rutas.