Vodafone pon a disposición dos seus clientes os últimos produtos de Apple

Vodafone anunciou hoxe que xa está a comercializar os últimos produtos de Apple, incluíndo o Apple Watch Series 6, Apple Watch SE, a oitava xeración do iPad e (en datas vindeiras) o redeseñado iPad Air. En termos máis concretos, os clientes poden mercar o Apple Watch Series 6, o Apple Watch SE e o novo iPad desde o pasado venres a través de Vodafone e o iPad Air a partir de outubro.
A operadora tamén fai saber que “grazas ao servizo Vodafone OneNumber”, os usuarios da compañía poderán usar o seu número de teléfono e a súa tarifa de datos nos novos dispositivos de Apple e estar sempre conectados sen necesidade de ter o seu smartphone preto.
A operadora explica que o Apple Watch Series 6 inclúe importantes melloras de hardware, como un chip S6 System in Package (SiP) máis rápido, un altímetro sempre activo de nova xeración e a gama de acabados de caixa e correas, incluíndo a carcasa Vodafone Red de aluminio.
Pola súa banda, o Apple Watch SE vén, en palabras da compañía de telecomunicacións, “con todas as prestacións máis importantes do Apple Watch nun deseño moderno que engaiolará aos clientes e a un prezo máis alcanzábel”. Está dispoñíbel en tres acabados cunha caixa de aluminio 100% reciclaxe e conta coa pantalla Retina máis grande e máis avanzada até a data e inclúe o mesmo acelerómetro, o xiroscopio e o altímetro sempre activo do Apple Watch Series 6.
Polo que respecta á oitava xeración do iPad, conta co potente chip A12 Bionic, o que supón, en palabras de Vodafone, “un gran chimpo en canto ao rendemento”. A12 Bionic leva o Neural Engine ao iPad por vez primeira, facilitando tarefas como a edición de fotos, experiencias de Realidade Aumentada, recoñecemento de escritura a man e moito máis.
Por último, o novo iPad Air está dispoñíbel en cinco acabados e conta cunha pantalla Liquid Retina de 10,9 polgadas de bordo a bordo e un novo sensor Touch ID. Este novo iPad Air estrea A14 Bionic, o chip máis avanzado creado por Apple, cun gran rendemento que permitirá editar vídeos en 4K, crear abraiantes obras de arte ou experiencias de inmersión nos xogos en liña máis avanzados.