Vodafone realiza en España un piloto que demostra os beneficios do espectro de 6 GHz

mércores, 25 de outubro do 2023 S. P.

A compañía Vodafone compartiu os detalles dun piloto impulsado pola operadora que demostraría os beneficios do espectro de 6 GHz ante “a posíbel escaseza de capacidade da tecnoloxía 5G”. Segundo explica a empresa no seu balance, a habilitación desta banda para o uso móbil “garantirá que os clientes, particulares e empresas, reciban servizos 5G aínda máis rápidos e fiábeis nun prazo de 5 a 10 anos, ao mesmo tempo que evitará a falta de capacidade móbil causada pola crecente demanda de datos”.
Os enxeñeiros de Vodafone España, utilizando un smartphone adaptado á banda espectral de 6 GHz que estará dispoñíbel nos países europeos, alcanzaron velocidades de descarga de ata 5 Gbps, máis ou menos o dobre da velocidade que poden alcanzar as redes actuais. No que que se refire ás probas desenvolvidas en espazos interiores, acadouse unha media de 2 Gbps, en palabras da operadora “unha velocidade importante tendo en conta que o 75% do tráfico móbil xérase en fogares, oficinas e espazos públicos interiores como cafeterías, tendas, restaurantes ou ximnasios”.
A operadora explica que estas probas “demostran que esta tecnoloxía ten o potencial de conseguir niveis de cobertura comparábeis aos das redes 5G actuais, poñendo de manifesto que a banda pode despregarse de forma doada, rendíbel e eficiente nos emprazamentos móbiles existentes e para obter un aumento da capacidade cando se esgote o largo de banda actual”.
A compañía tecnolóxica presentou as conclusións do seu piloto antes do encontro no que participan reguladores nacionais e membros da industria o próximo mes en Dubái: a Conferencia Mundial de Radiocomunicacións (CMR-23), un encontro no que, segundo explica Vodafone, decidirae o futuro uso “deste valioso recurso do espectro”. Vodafone, entre outras firmas de redes móbiles, defende que a banda superior do espectro de 6 GHz sexa asignada ás Telecomunicacións Móbiles Internacionais (IMT), baixo a consideración de que “isto promoverá a harmonización dos servizos 5G nas diferentes áreas xeográficas e equilibrará a asignación da sección inferior da banda xa asignada aos servizos Wi-Fi”. Desta forma, as empresas, as organizacións do sector público e os usuarios particulares de toda Europa poderán beneficiarse do mellor da rede móbil e o Wi-Fi, apunta a compañía.
Alberto Ripepi, responsábel da área Network de Vodafone, sinalou: “Sen unha asignación xusta e equilibrada do espectro de 6 GHz, os usuarios de rede móbil de todo o mundo poderían ter que enfrontarse a unha crise de capacidade en aproximadamente cinco anos. O espectro 5G adicional impulsaría a transformación dixital das empresas e as organizacións do sector público, e apoiaría a ambición da Comisión Europea de ter unha conectividade rápida ao alcance de todas as zonas poboadas para 2023”. Ripepi engadiu que a presión de liberar máis espectro “aumenta a medida que o fai a demanda de largo de banda”. No caso de Vodafone, a operadora viu medrar esta demanda un 30% cada ano en toda Europa a medida que máis dispositivos e servizos, como gafeñas de Realidade Aumentada, vehículos ou sensores para a saúde, conéctanse á rede 5G, “xa que todos eles requiren de redes móbiles con maior potencia e capacidade de procesamento”.

PUBLICIDADE