Volven este martes, en formato online, as Distopías Cotías de Coruña Dixital

Este martes 27 regresa dende A Coruña unha máis que interesante actividade de debate e participación arredor das tecnoloxías que cambian o mundo e, cun uso axeitado das mesmas, con importantes melloras para o noso xeito de traballar, formarnos, interactuar e comunicarnos. Trátase do ciclo Distopías Cotías, que retoma a súa actividade este outono con varios encontros en liña, o primeiro dos cales celébrase este martes, poñendo o foco en como converternos en cidadáns dixitais á par que conscientes e críticos dende o noso empoderamento tecnolóxico. O ciclo, que vén da man da Rede Municipal de Bibliotecas e Coruña Dixital coa implicación do Centro Ágora, avaliará este outono o impacto das novas ferramentas nas nosas vidas.
Os encontros, que novamente teñen carácter mensual, serán en liña e respectarán a estrutura habitual: unha pequena charla introdutoria e un tempo de posta en común, debate e preguntas aberto a todas as asistentes.
Este mes de outubro, Distopías Cotiás achégase ao camiño cara unha cidadanía dixital máis consciente, crítica e activa da man de Víctor Sampedro, profesor de Comunicación Política e Opinión Pública, con quen poderán conversar os participantes nas sesións arredor das iniciativas de alfabetización tecnolóxica que impulsa. Sampedro é autor de Dietética digital para adelgazar al Gran Hermano (Icaria, 2018), un libro liberado e actualizado con recursos, manuais de iniciativas similares e unha guía didáctica que podemos atopar na súa web.
A sesión de Dietética Dixital no programa celébrase en paralelo a outra iniciativa impulsada xunto a asociación valenciana Cidadanía e Comunicación: unha serie de obradoiros en liña baixo o título Persoas consumidoras versus cidadanía dixital, encamiñados a educadores e formadores e que xa teñen aberta a inscrición.
A sesión deste martes
A sesión deste martes 27 de outubro será unha sesión en liña que poderemos seguir en directo a través de YouTube, a partir das 19:00 horas. Nela, escoitaremos as reflexións de Víctor Sampedro sobre como sermos cidadáns dixital máis conscientes e críticos, tralo que se abrirá o tempo de debate, aberto a todas e todos os participantes. Unha vez celebrada, a sesión quedará a disposición da comunidade internauta na canle de Youtube de Coruña Dixital, onde se atopan aloxadas as sesións previas de Distopías Cotiás, así como outros contidos.