Volven os podcasts de Aquí faltan páxinas cunha charla sobre Ángeles Alvariño

luns, 11 de setembro do 2023 S. P.

Volven as charlas-podcast do programa de divulgación Aquí faltan páxinas, co que a Deputación de Pontevedra reivindica as importantes contribucións científicas, culturais e innovadoras das nosas mulleres. As actividades regresan este mércores 13 cunha xornada sobre a traxectoria da científica Ángeles Alvariño. Será impartida pola filla da oceanógrafa e pioneira da investigación mariña, Ángeles Leira, a partir das 19:00 horas. Ese día tamén estará dispoñíbeis un podcast e un roteiro.
Relatos sonoros
A oceanógrafa e pioneira na investigación mariña Ángeles Alvariño protagoniza neste mes de setembro o programa da Deputación de Pontevedra Aquí faltan páxinas. Este ciclo de relatos sonoros e conferencias nace da colaboración da institución provincial coa firma O Cable Inglés para dar a coñecer a traxectoria de mulleres galegas extraordinarias moi relacionadas coa provincia. Este mércores 13 de setembro a sala Rosalía de Castro da sede da Deputación en Vigo acollerá a partir das 19:00 horas un faladoiro sobre a traxectoria da científica que impartirá a súa filla, Ángeles Leira.
Ángeles Alvariño
Segundo explican dende O Cable Inglés e a Deputación de Pontevedra, Ángeles Alvariño adoita ser recordada como a primeira muller investigadora que se embarcou nun buque oceanográfico, pero a súa traxectoria foi máis alá e está recoñecida como unha das maiores especialistas do mundo no seu campo e no seu tempo. Así, descubriu 22 novas especies mariñas e revelou como a presenza de distintas formas de zooplancto na auga podía servir de indicador do estado de saúde dos mares e caladoiros de pesca. Aínda que na España do pasado século as mulleres científicas eran case unha anomalía, a ferrolá logrou facerse un oco e destacar nese eido de coñecemento.
O faladoiro estará a cargo da súa filla, a arquitecta e urbanista Ángeles Leira. Ela foi a segunda muller en matricularse na Escola de Enxeñería de San Diego State College e titulouse máis tarde en Arquitectura en Berkeley. Desempeñou a súa traxectoria na cidade de San Diego, onde traballou na planificación de comunidades e chegou a ser vicepresidenta do Colexio de Urbanistas e supervisora dos planos reguladores das 27 comunidades de San Diego.
Ademais da conferencia, a historia de Ángeles Alvariño estará tamén dispoñíbel a partir deste mércores no podcast de Aquí faltan páxinas (nas principais plataformas de streaming e no sitio web da institución provincial) e nun roteiro virtual que inclúe os lugares da provincia claves na biografía da protagonista. Entre eles, o Instituto Oceanográfico de Vigo (no que traballou), así como o porto e a ría de Vigo ou os Asteleiros Armón.
O proxecto Aquí faltan páxinas inclúe unha antoloxía de 12 podcasts, un por cada mes de 2023, para pór en valor os logros de María Soliña, Elisa Patiño, Olimpia Valencia, Maruja Mallo, Concepción Arenal, Antonina Sanjurjo, María Vinyals, Ernestina Otero, Ángeles Alvariño, Isabel Barreto, Carolina Otero e Sofía Novoa.


PUBLICIDADE