WD presenta discos duros portátiles e ultra delgados de 2 TB

Western Digital está a presentar estes días o seu novo My Passport Slim, un disco duro portátil de até dous TB de moi miúdas dimensións (sobre todo en grosor) e que inclúe conexión USB 3.0 para garantir a transferencia rápida e deseño compacto metalizado. Segundo informa WD, estamos ante o primeiro trebello de memoria de alta capacidade con dimensións propias dun aparello ultra delgado. Por este e outros motivos, está pensado máis para ser carretado de aquí a alá que para ter un emprazamento fixo, polo que se adaptaría especialmente aos usuarios móbiles.
O trebello acubilla cifrado por hardware e inclúe o software WD Smar Ware Prol, compatíbel con Dropbox. Ten dúas versións de memoria, de 1 TB e 2 TB, e ofrécese en catro cores. As dimensións son de 110x80x12,3 milímetros e contan cunha garantía limitada de 3 anos. Témolos dispoñíbeis na tenda en liña WD Store e en distribuidores seleccionados. As unidades My Passport Slim teñen un prezo recomendado polo fabricante de 129,90 euros (1TB) e de 209,90 euros (2TB).