Weplan advirte que os españois malgastan 263 euros ao ano na súa factura de teléfono

martes, 15 de xullo do 2014 Redacción

Os responsábeis de Weplan, a aplicación móbil de aforro telefónico, veñen de de facer un estudo sobre o que se malgasta no ámbito estatal en materia de tarifas pouco axeitadas para cada cidadán e para súas necesidades específicas. Segundo se amosa a través da investigación, os españois tirarían ao lixo 263 euros ao ano na súa factura de teléfono. Pola contra, de contrataren a factura que mellor lles acae, engade Weplan, a taxa media de aforro roldaría os 250 euros, “unha cifra nada desprezábel nos tempos que corren”, explica a compañía. O estudo en cuestión dirixíase a demostrar que no mercado estatal da telefonía aínda hai moitos usuarios que non saben cal é a tarifa que máis lle convén, e semella que finalmente conseguiu o seu obxectivo.
Para Weplan “non existen tarifas caras ou baratas, se non que existen diferentes patróns de consumo e, por tanto, diferentes necesidades para cada usuario”. O estudo en cuestión partía da seguinte pregunta: Como é que se tiran tantos cartos en tempos de crise? De primeiras, a base do problema semella estar en que moitos usuarios rematan por atarse ás compañías por medio da permanencia, o cal non lles permite trocar de operador se finalmente dan con outro que se adapte mellor ás súas necesidades. “Unha vez superado este período”, engádese, “moitos déixanse engaiolar pola enorme cantidade de ofertas de terminais e de tarifas que hai no mercado, a maioría das veces sen chegar a ler a letra pequena”.

PUBLICIDADE