WhatsApp contará en breve con transcricións para as mensaxes de voz

Tras moitos meses en probas, tanto para iOS como para Android, WhatsApp anuncia oficialmente que nas vindeiras semanas chegarán a todo o mundo as transcricións de mensaxes de voz, ou sexa, que cando recibamos unha mensaxe de voz gravada, a aplicación de mensaxería interpretará o que di e permitiranos consultar unha versión en texto, facilitando que poidamos saber rapidamente de que trata ou que poidamos atendelo aínda que esteamos nun ambiente ruidoso (así como tamén a función pode axudar moito a localizar contidos entre as mensaxes recibidas).
As transcricións xéranse no nos propio dispositivo, ou sexa, que nin sequera dende WhatsApp coñecerán o seu contido, e esta función debe activarse por parte do usuario, xa que será preciso que elixamos o idioma de transcrición (inicialmente o español está entre os mesmos, aínda que aseguran que ampliarán no futuro o número de linguas dispoñibles) para que se poida instalar en local no noso teléfono un paquete de idioma que facilitará a transcrición (dun xeito semellante ao que acontece nos teléfonos Samsung Galaxy cando queremos gozar das funcións avanzadas de voz).
Unha vez configurado o WhatsApp para ter dispoñibles as transcricións, cando seleccionemos unha nova de voz que recibamos teremos entre as opcións dispoñibles a de Transcribir, que permitirá convertela a texto, mellorando considerablemente a experiencia de uso de WhatsApp.
Dende WhatsApp aseguran que os idiomas dispoñibles para as transcricións actualmente son o inglés, o portugués, o ruso e o español, advertido de que as transcricións poden non ser precisas, e que se o idioma da mensaxe de voz non coincide coa lingua que teñamos para transcricións tamén podemos recibir mensaxes de erro. Sen dúbida, será interesante comprobar se o galego pode transcribirse como español ou como portugués.