WhatsApp incorpora tradución de mensaxes en local

A aplicación de mensaxería instantánea WhatsApp, utilizada por máis de tres mil millóns de persoas en máis de 180 países, permitirá agora traducir contidos dentro das conversas sen ter que recorrer a servizos externos (como Galaxy AI, que xa ofrecía tal función aos usuarios de móbiles de Samsung).
O sistema funcionará cunha pulsación longa sobre a mensaxe e a opción Traducir. O usuario poderá escoller a lingua de orixe ou destino e gardar esa configuración para traducións futuras. A novidade é válida tanto en conversas individuais como en grupos e actualizacións de canles. Ademais, en Android existirá a posibilidade de activar a tradución automática de todo un fío, de maneira que todas as mensaxes entrantes aparezan xa traducidas.
O proceso de tradución realízase directamente no dispositivo, sen que WhatsApp poida acceder ao contido, comezando a implantación desta funcionalidade hoxe mesmo. En Android, as traducións estarán dispoñibles inicialmente en seis idiomas (inglés, español, hindi, portugués, ruso e árabe), mentres que en iPhone arrancan con máis de 19 linguas. A previsión é ampliar este abano progresivamente.