Women in Games organiza en novembro o seu terceiro evento anual na Coruña
mércores, 30 de outubro do 2019
Women
in Games, a asociación de mulleres desenvolvedoras de videoxogos
no ámbito estatal, vai organizar o seu terceiro evento anual na
Coruña, máis en detalle no salón de actos da Facultade de
Comunicación Audiovisual. Será o vindeiro 12 de novembro e
contarase coa participación de Sara Álvarez Cubelos (responsábel
da creatividade de contornas e ambientes -environments-
en Gato Studio), Eugenia Suárez Núñez (creadora 3D en Gato
Studio), Bárbara Martínez Solé (creadora de contornas en Gato
Studio) e Ana Barrós Calvete (co-fundadora de Identik3D).
O
evento será de balde, e consistirá nunha serie de clases maxistrais
sobre cada unha das especialidades das relatoras (terreo, personaxes,
escenarios e impresión 3D, respectivamente), precedidas por un panel
no que explicarán o seu traballo: en que consiste, cales son as súas
responsabilidades, por que optaron por esa especialización e que
estudaron para conseguilo.
A
edición de 2019 está coordinada pola embaixadora local de Women in
Games na Coruña, María Fernández Hermida, en colaboración coa
Universidade da Coruña e a Facultade de Comunicación Audiovisual e
patrocinada por Campus Innova, o Centro de Estudos de Xénero e
Feministas CEXEF), Gato Studio e Google.
A
asociación
Women
in Games (WiGJ) é unha asociación internacional con sede en Londres
que traballa a día de hoxe para incrementar o número de mulleres
que se adican profesionalmente ao sector dos videoxogos, e do que na
actualidade conforman tan só en torno a un 20%. En marzo de 2017,
WiGJ, en colaboración con Google, lanzou o Programa de Embaixadores
de Women in Games. A dirección da asociación nomeou a 40 persoas
chave (número que na actualidade acada xa as 114), distribuídas ao
longo de máis de 10 países, co obxecto de que traballen localmente
para promover os obxectivos da asociación na súa contorna máis
inmediata, a través do desenvolvemento de eventos, congresos,
charlas, mesas redondas, obradoiros, etc. destinados a un público
mixto, pero con especial interese nas profesionais que xa traballan
na industria ou que están interesadas en facelo.