WordPress terá que deixar de bloquear a WP Engine

Araceli Martínez-Olguín é a xuíza encargada da causa de WP Engine contra Automattic (WordPress)

O conflito entre WordPress e WP Engine chegou aos tribunais de California, e a espera de que se xulgue o fondo do asunto, como medidas cautelares a xuíza Araceli Martínez-Olguín ordenou o levantamento das medidas de WordPress.org contra WP Engine, de xeito que teñen que deixar de bloquearlle o acceso aos seus servidores e deixar de influír nos seus plugins.
A maxistrada recoñece que o argumento de Matt Mullenweg de que os problemas que está a encarar WP Engine son consecuencia de construír o seu negocio ao redor dunha páxina web sobre a que «non teñen ningún dereito contractual de uso», pero tamén destaca o feito de que as accións contra WP Engine non se realizan contra ningún outro competidor, o que «non pode ignorarse».
A virulencia coa que Mullenweg está a actuar contra WP Engine non ten precedentes, afectando claramente a imaxe da compañía, pero tamén tendo grande repercusión no seo de Automattic (a compañía detrás de WordPress.com), con traballadores que chegaron a deixar a empresa por mor dunhas prácticas que non consideran éticas.
Con independencia de como remate a causa xudicial, o que queda claro é que non se pode confiar o funcionamento dun proxecto empresarial nunha infraestrutura dun competidor en base a un escenario actual que pode mudar drasticamente no futuro, afectando á viabilidade empresarial a longo prazo.