X fará negocio cos nomes de usuario

X (a antiga Twitter) anunciou que está a ultimar o X Handle Marketplace, unha nova plataforma que permitirá redistribuír nomes de usuario inactivos. O sistema, que xa abriu a súa listaxe de agarda, estará dispoñible inicialmente para subscritores de Premium+ e de Premium Business con acceso total, que poderán solicitar ou adquirir nomes de usuario non utilizados, tanto de forma gratuíta como mediante pagamento.
A iniciativa pretende regular o mercado paralelo de contas e evitar o uso indebido de nomes valiosos. Os subscritores elixibles poderán explorar nomes inactivos, rexistrar o seu interese ou participar en eventos de lanzamento de identificadores pouco comúns. A plataforma distinguirá entre dous tipos principais de nomes: Os prioritarios estarán dispoñibles sen custo adicional para os subscritores de pagamento e adoitan incluír nomes completos, combinacións alfanuméricas ou frases curtas, como @GabrielJones ou @ParadoxAI; e os raros, pola súa banda, asociaranse a palabras xenéricas ou con relevancia cultural, como @Pizza, @Tom ou @One, e só se poderán conseguir en liberacións limitadas ou mediante compra directa con invitación, con prezos que poderán variar entre 2 500 dólares e cifras de sete díxitos segundo a súa popularidade ou brevidade.
Segundo a información publicada por X, as solicitudes de nomes prioritarios revisaranse nun prazo de tres días laborables e non implicarán cambios nos seareiros nin nas publicacións do usuario. Se a subscrición se cancela ou se rebaixa, o nome anterior recupérase automaticamente. A compañía xustifica que non libera nomes inactivos para o público xeral co obxectivo de evitar o spam e o uso indebido por bots, e advirte de que a venda ou transferencia fóra da plataforma está prohibida e pode derivar na suspensión da conta.
Os interesados poden unirse á listaxe de agarda para reservar o nome que desexen, mentres X anuncia que o acceso ao marketplace se ampliará progresivamente a máis usuarios nas vindeiras semanas.