X permite contas verificadas de terroristas

Unha investigación do Tech Transparency Project (TTP) destapa unha situación delicada para a plataforma X/Twitter, ao revelar que varios individuos sancionados polos Estados Unidos, entre eles un asesor de Al-Qaida, un fundador de Hezbolá, o líder dunha milicia iraquí e un alto cargo houthi, contan con contas premium no servizo. Estas contas, que presentan a marca azul de verificación e mesmo a etiqueta de identidade verificada, implican que a empresa aceptou documentación oficial e autofotos para autenticar os seus titulares.
A normativa da Oficina de Control de Activos Estranxeiros (OFAC) prohibe a empresas estadounidenses realizar transaccións con persoas ou organizacións suxeitas a sancións, salvo autorización expresa. As políticas da propia X recollen esta prohibición, indicando que os seus servizos premium non están dispoñibles para suxeitos sancionados. Non obstante, algunhas das contas detectadas por TTP incluso activaron funcións de monetización, como os botóns para recibir doazóns.
Este feito resulta aínda máis controvertible se se ten en conta que Elon Musk, á fronte tanto de X como do chamado Departamento de Eficiencia Gobernamental (DOGE) da administración Trump, criticou publicamente o Departamento do Tesouro en febreiro por non contar con controles básicos que garantan que os pagamentos non rematen en mans de organizacións terroristas. Fíxoo durante unha aparición conxunta con Donald Trump no Despacho Oval, afirmando que eses controis existen «en calquera empresa».
O caso volve poñer en dúbida a capacidade da plataforma para cumprir coas obrigas legais impostas polas autoridades estadounidenses.